Rıo-de-Janeıro qalasynda tamyzdyń 5-inen 21-ine deıingi aralyqta kórik qyzdyrǵan XXXI jazǵy Olımpııalyq oıyndar da tarlan tarıhtyń tórine ozyp, ótkenniń enshisinde qalyp barady. Bul Olımpıada elimiz Táýelsizdik alǵan jyldardan bastap dińgegi tik kóterilgen qazaq sporty týynyń sol qalpynda kókte samǵap turǵanyn kórsetip berdi.
Bizdiń sańlaqtarymyz tap osy Oıyndar aldynda birqatar tańdaýly, altyn júldeniń birden-bir úmitkeri sanalǵan úzdikteri syrttan kelgen soqqynyń saldarynan qatardan shyǵyp qalǵandaryna qaramastan, bul alamanda ózderiniń eldiń namysy, Otannyń ar-ojdany jolynda baryn sarp ete alatyn naǵyz qaharmandar ekenderin tanytyp shyqty. Sonyń arqasynda Qazaqstan qorjynyna 3 altyn, 5 kúmis jáne 9 qola medal tústi. Osylaısha 17 medaldy enshilegen komanda munyń aldynda Beıjińde ómirge kelip, Londonda qaıtalanǵan rekordtyq deńgeıden 4 medal asyp tústi. Munda tek altyn medal jóninen ǵana munyń aldyndaǵy London Olımpıadasynan mejemizdi túsirip alsaq, kúmis jáne qola medaldar jóninen buryn-sońdy bolmaǵan kórsetkishke qol jetkizdik. Osy básireli báseke aldynda eń qatty soqqyǵa ushyraǵan aýyr atletterimiz shyn máninde de erlikke tán áreket jasap, álemniń kil myqty ziltemirshileri kúsh jarystyrǵan shaıqasta komandalyq besinshi orynǵa ıe boldy. Qazaqstan sportshylary sapynan birinshi altyn medaldy ákelgen de osy ziltemir tarlandary boldy. Bul qalǵan sańlaqtarymyzǵa úlken serpin berdi.
Osy Oıyndarda respýblıka sportshylary birinshi ret sý sporty túrlerinen jaı medal alyp qana qoıǵan joq, onyń chempıondyq tuǵyrdy syılaıtyn altyn júldesine qol jetkizdi. Munyń sońyn bylǵary qolǵap sheberleri ilip áketti. Olar ortaq qazynaǵa 1 altyn, 2 kúmis jáne 2 qola medal ákelip, buǵan deıin Olımpıadalardaǵy jalpy medaldar sanynan artyq kórsetkish kórsetti. Balýan qyzdarymyzdyń erlikteri óz aldyna bir tóbe! Jeńil atletıkadaǵy tabysty jol taǵy jalǵasyn tapty.
Osynyń bári sportshylarymyzdyń Rıo tórinde elimizdiń jalaýyn asqaq jelbiretip qaıtqanyn kórsetedi.
Al búgin Astanada olımpıadashylarǵa qurmet kórsetý sharasy ótkeli tur.