Bul esirtkige elitýshilik ne istetpeıdi dersiz. Budan qyrýar paıda taýyp, qaltasyn qalyńdatyp júrgender qanshama? Esirtki negizinen, elimizdiń aýmaǵyna ár túrli shym-shytyryq, barmaq basty, kóz qysty nebir qıturqy joldarmen jetkiziletini de jasyryn emes. Oral óńirinde bulaısha áýre-sarsańǵa túspeı-aq, ony óz úıiniń aýlasynda ósirýdi ádet etkender de bar bolyp shyqty. Bul jóninde gazet tilshisine Terekti aýdandyq ishki ister bóliminiń basshysy, polısııa podpolkovnıgi Tımýr Aıtýǵanov aıtyp berdi.
Osy aýdanǵa qarasty Aqsýat aýylynyń turǵyny K. óz baqshasynda qarasora ósiripti. Qarasora tektes ósimdik – esirtkiniń bir túri ekeni belgili. Ol osy esirtkilik shópti kádimgideı kútip, baptap, qopsytyp kelipti. Bul aradan toǵyz túp qarasora tabylǵan. «Murtqa ókpelep júrgende, saqal shyqty» degendeı, osy aýdandaǵy Tabyltóbe aýylyndaǵy 62 jastaǵy B. degen azamat qarasoranyń birden 56 túbin ósirýge táýekel etipti. Jaıyq aýylynda da osyndaı oqıǵalar kezdesken. Sondaı-aq, aýdanda qazirgi kúni on tórt kılogramnan asatyn keptirilgen anasha tárkilengen.
Esirtkimen enshiles qarasora ósirý – aýyr qylmystar qataryna kiredi. Sondyqtan, osyndaı las ispen shuǵyldanǵandarǵa qatań jaza qoldanylýy ábden múmkin.
Temir QUSAIYN,
«Egemen Qazaqstan»
Batys Qazaqstan oblysy
Terekti aýdany