Sportsúıer qaýymǵa súıinshi jańalyǵymyz bar. Qazaq fýtbolshylary kári qurlyqtyń beldi týrnırinde jyl sońyna deıin dop tebetin bolady. Keshe, gazet beti qattalyp jatqanda fýtboldan Eýropa lıgasy aıasynda óner kórsetetin «Astana» komandasy syrt alańda, Belarýstiń BATE fýtbol klýbymen kezdesip, 2:2 esebimen teń tústi.
Toptyq kezeńge joldama beriletin pleı-off oıyny bolǵandyqtan, elordalyq ujym á degennen-aq baryn salyp oınaýǵa talpynǵan. Áıtkenmen, Stanımır Stoılov shákirtteri birinshi bolyp óz qaqpalaryna gol jiberip aldy. Qaqpamyzǵa gol soqqan – Mıhaıl Gordeıchýk. Bir qyzyǵy, belarýs shabýylshysy Qaraǵandynyń Saran qalasynyń týmasy. Ol 18 jasqa deıin atalmysh qalada fýtboldyń qyr-syryn meńgerip alǵannan keıin, Belorýssııaǵa kóship ketken eken.
Hosh, ekinshi kezeńdi «Astana» jigitteri shıraq bastady. Serikjan Mujyqov, Nemanıa Maksımovıch jáne Patrık Tvýması syndy sheberlerimiz alań qojaıyndarynyń qorǵaýshylaryn ábden sastyrdy. Sondaı urymtal sátterdiń birinde buryshtamadan asyrylǵan dopqa bárinen buryn jetken Nemanıa Maksımovıch ony qarsylastar qaqpasyna búlk etkizip, esepti teńestirdi. Bul oıynnyń 50-shi mınýty bolatyn. Al kezdesýdiń 76 mınýtynda ganalyq legıonerimiz Patrık Tvýması shamamen 25 metrden soqqy jasady. Onyń shirene tepken dobyna qaqpashy Artem Soroko úlgere almaı, óz jankúıerleri aldynda pushaıman boldy. Esep – 2:1, «Astana» alǵa shyqty.
Alaıda, óz jankúıerleri aldynda uıatqa qalmaýdy oılaǵan BATE oıynshylary baryn salyp, 89-mınýtta penaltı arqyly esepti teńestirdi. Igor Stasevıch esepti 2:2 esebine jetkizgenimen, ary qaraı nátıje ózgergen joq.
Osylaısha, Stanımır Stoılov baptaıtyn elordalyq «Astana» Eýropa lıgasynyń toptyq kezeńine joldama alyp, eýrokýbok jolyndaǵy jarysyn odan ári jalǵastyratyn boldy.
Aıta keteıik, alǵashqy oıyn 2:0 esebimen «Astananyń» paıdasyna sheshilgen bolatyn.
Almas MANAP,
«Egemen Qazaqstan»