Qola júldegerler

Olga Sergeevna RYPAKOVA  Jeńil atlet. Eńbek sińirgen sport sheberi. О́skemen qalasy 1984 jyly 30 qarashada О́skemen qalasynda týǵan. – Olımpııalyq oıyndardyń chempıony (London, 2012), úsh qarǵyp sekirý; – Olımpııalyq oıyndardyń qola júldegeri (Rıo-de-Janeıro, 2016), úsh qarǵyp sekirý; – Álem chempıonatynyń kúmis júldegeri (Tegý, 2011), úsh qarǵyp sekirý; – Álem chempıonatynyń qola júldegeri (Beıjiń, 2015), úsh qarǵyp sekirý; – Jabyq zalda ótken álem chempıonatynyń jeńimpazy (Doha, 2010), úsh qarǵyp sekirý; – Jabyq zalda ótken álem chempıonatynyń kúmis júldegeri (Ystanbul, 2010), úsh qarǵyp sekirý; – Azııa oıyndarynyń chempıony (Inchhon, 2014), úsh qarǵyp sekirý. «Barys» ordeniniń ıegeri. Jattyqtyrýshysy: Sergeı Dmıtrevıch Alek­seev. Jeńil atletıkadan London olımpıadasynyń chempıony Olga Rypakova Rıo-de-Janeırodan da júldesiz qaıtpady. Ol úsh qarǵyp sekirýden synǵa túsip, alǵashqy úshtiktiń qatarynan tabyldy. О́ziniń birinshi talpynysyn jaqsy paıdalanǵan jerlesimiz osy kezeńnen keıin kósh bastap turdy. Onyń aldymen 14,47 metrdi, sońynan 14,73 metrdi kórsetken kórsetkishi aldyńǵy qatarǵa shyqty. Biraq keıinirek kolýmbııalyq Katrın Ibargýen birden 17,15 metrge sekirip, alǵa shyǵandap ketip qaldy. Osydan keıin Rypakova ekinshi orynǵa jyljyp ketti. Alaıda, sosyn venesýelalyq Iýlımar Rohas 14,98 metrge jetip, Olgany úshinshi pozısııaǵa qaraı jyljytyp jiberdi. Osy sońǵy kórsetkish Rypakovany Londonda altyn medalǵa jetkizip edi. Albıon jerindegi alamannan keıin Olga Rypakova óziniń ekinshi balasyn ómirge keltirdi. Bul onyń otbasyna kóbirek alańdaýyna alyp bardy. Degenmen, osy aralyqta júrip-aq Olga biraz álemdik jáne halyqaralyq jarystarǵa qatysyp, júldeli oryndardan kórinip júrdi. Aıta keteıik, Olgany óz ákesi Sergeı Alekseev jattyqtyrady. Ol kúıeýi Denıs Rypakovpen birge qazir bir ul, bir qyz tárbıelep otyr. Dýman ANASh, «Egemen Qazaqstan»  О́SKEMEN Ekaterına Alekseevna LARIONOVA Balýan. Sport sheberi. Oral qalasy Batys Qazaqstan oblystyq ishki ister departamenti jyldam áreket etý arnaıy jasaǵynyń qyzmetkeri, polısııa kishi leıtenanty. 1994 jyly 23 qańtarda Batys Qazaqstan oblysy, Bórli aýdany, Prıýral aýylynda týǵan. – Olımpııalyq oıyndardyń qola júldegeri (Rıo-de-Janeıro, 2016), 63 kg; – Álem chempıonatynyń qola júldegeri (Býdapesht, 2013), 63 kg; – Azııa chempıonatynyń qola júl­degeri (Astana, 2014), 63 kg; – Azııa chempıonatynyń qola júldegeri (Doha, 2015), 63 kg. Jattyqtyrýshysy: Alek­seı Stanıslavovıch Larıonov. Teginde, «Balasy atqa shapsa, anasy úıde taqymyn qysady» degen ras. Ekaterına Larıonova Rıo kileminiń shańyn qaǵyp júrgende, onyń Oraldaǵy ata-anasy Alekseı jáne Natalıa Larıonovtar da sondaı kúıdi bas­tan keshti. О́ıtkeni, olardyń tula boıy tuńǵyshtary, otbasyndaǵy bes perzenttiń úlkeni, jalǵyz dara qyzǵaldaǵy Katıa beldesý kezeńin kóbirek kútip qaldy. Biz muny Katerına júlde alǵan kúni Larıonovtar otbasyna bas suqqanda, anyq baıqadyq. – Qazirgi sáttegi kóńil-kúılerińiz jóninde aıtyp bermes pe ekensizder? Osy saýal berilgen sátte qýanyshtan júzderi alaýlap janyp turǵan erli-zaıypty Alekseı jáne Natalıa Larıonovtar bir-birine qarap qaldy. Bul, árıne, qaısymyz bastap aıtamyz degen ıshara men belgi bolatyn. Qaı otbasynda da áke – asqar taý, qamqorshy emes pe? Al Katıa úshin ákeniń orny tipti bólek deýge bolady. Sebebi, Alekseı Stanıslavovıch onyń ákesi ǵana emes, Olımpıadaǵa qaltqysyz ázirlegen jattyqtyrýshysy da. Sondyqtan qyzdary jónindegi alǵashqy  ata-analyq yqylas sózdi ákeniń bastaýy qaı turǵydan da oryndy ekeni anyq edi. Áke sózi óte qysqa boldy. Muny da túsinýge bolatyn sekildi. Basty másele uzyn sózde emes, júrekten shyqqan qysqa peıil men túpki nátıjede ǵoı. Al anasy aqtaryldy. Biraq bulardyń bir-birlerine uqsaıtyn bir nárseleri bar edi. Ol – ekeýiniń de tólderiniń basy, sýlarynyń tunyǵy – Katıany janyndaı jaqsy kóretinderi jáne onyń áli talaı asýdan asatynyna senimderi edi. Qysqasha til qatysý sáti aıaqtalyp, kóshege shyqtyq. Qýanysh pen shattyq kernegen, ár buryshyna meıirim men mamyrajaı tirlik uıalaǵan Larıonovtar úıi artymyzda qalyp barady. О́mirge Katıýshadaı jany jomart, baıypty da baısaldy, rııasyz kúlimsireı qaraǵandaǵy aıdaı dıdarynan jyly nur tógilip sala beretin qaısar da kórkem qyzdy dúnıege keltirip, tárbıelegen erli-zaıypty Alekseı jáne Natalıa Larıonovtarǵa degen súıispenshilik sezim qaldy kókeıde.  Temir QUSAIYN, «Egemen Qazaqstan»  ORAL   Ivan Fıodorovıch DYChKO Boksshy. Eńbek sińirgen sport sheberi. Rýdnyı qalasy, Qostanaı oblysy. Rýdnyı ındýstrıaldy ınstıtýtynyń stýdenti. 1990 jyly 11 tamyzda Qostanaı oblysy, Rýdnyı qalasynda týǵan. – Olımpııalyq oıyndardyń qola júldegeri (London, 2012), +91 kg; – Olımpııalyq oıyndardyń qola júldegeri (Rıo-de-Janeıro, 2016), +91 kg; – Álem chempıonatynyń kúmis júldegeri (Almaty, 2013), +91 kg; – Álem chempıonatynyń kúmis júldegeri (Doha, 2015), +91 kg; – Álem chempıonatynyń qola júldegeri (Baký, 2011), +91 kg; – Azııa oıyndarynyń kúmis júldegeri (Gýanchjoý, 2010), +91 kg; – Azııa chempıony (Amman, 2013), +91 kg. «Qurmet» ordeniniń ıegeri. Jattyqtyrýshylary: Vladımır Ivanovıch Shaırer, Iýrıı Anatolevıch Iаnov, Sapabek Myrzaǵalıuly Muqyshev. Rıo Olımpıadasynyń boksshylar týrnırinde asa aýyr salmaqta synǵa túsken jerlesimiz Ivan Dychko brıtanııalyq Djozef Djoıspen qolǵap túıistirip, 1:2 esebimen jeńilis tapqanda, kóńilde «áttegen-aı» bolǵanymen, jandy jubatarlyq jaǵdaıymyz da bar edi. Sebebi, qatarynan eki Olımpıadada qola júlde alyp jatqan bylǵary qolǵap sheberleri tym kóp te emes. Al jekpe-jektiń basy bizdiń boksshy úshin jaman bastalǵan joq. Bizdińshe teń kóringen urysta tóreshiler jeńisti Ivannyń qarsylasyna berip jiberdi. Esesine, qostanaılyq qyran ekinshi raýndta biraz ese qaıyrdy. Bul esepti teńestirýge múmkindik berdi. Sondyqtan sońǵy raýndtan kútken úmitimiz kóp boldy. Alaıda, osy tusta sharshaǵany bilingen Ivan jeńistiń salmaǵyn ózine qaraı buryp ketetindeı artyq qımyl jasaı almady. Muny boksshynyń ózi keıin aıtatyndaı, ol rasynda baryn saldy, biraq sharshap qalýy oılaǵanyn boldyrmady. Bul jerde eki birdeı Olımpııalyq oıyndardyń jartylaı fınalynda óner kórsetý múmkindigine qol jetkizgen Dychkonyń psıhologııalyq jaǵynan da qıyndyq kórgeni ańǵaryldy. Jalpy, bul Rıo jerinde qostanaılyq boksshy óte jaqsy óner kórsetti. Ol shırek fınalda nıgerııalyq kúshti qarsylasy Efe Adjagbany jeńýge biraz kúsh jumsap qoıdy. El-jurty Ivannyń bul tabysyn qýana qarsy aldy. Ony áýejaıdan oblys ákimi Arhımed Muhambetov bastaǵan úlken qaýym kútip aldy. Aımaq basshysy oǵan úsh bólmeli páterdiń kiltin syılady. Qymbat DOSJANOVA QOSTANAI Aleksandr Sergeevıch ZAIChIKOV Aýyr atlet. Halyqaralyq dárejedegi sport sheberi. Qyzylorda qalasy 1992 jyly 17 tamyzda Bela­rýstiń Vıtebsk oblysy, Lepel aýdany, Zaslonov selosynda týǵan. – Olımpııalyq oıyn­dar­dyń qola júldegeri (Rıo-de-Janeıro, 2016), 105 kg; – Álem chempıony (Hıýston, 2015), 105 kg. Jattyqtyrýshysy: Arman Abdraev. Qyzylordada úzdik ulandary úlken jarystarda synǵa túsip jatqanda, olardyń ónerin búkil el bolyp kórip, jankúıerlik etý úrdisi baıaǵydan bar. Burynǵy Olımpıadalarda Aqme­shit atyrabynyń azamattary Ilıa Ilın men Almas О́teshov saıysqa túsetin kúni or­ta­lyq alańǵa jınalyp, úlken ek­ran­nan tama­­sha­laıtyn. Bul úrdis Alek­sandr Zaıchıkovke kelgende de úzilgen joq. Aýyr atlet jarys jolyna shyǵatyn kúni  qala jastary áleýmettik jeli arqyly «Muz aıdynyna» jınalyp, sportshyǵa qoldaý kórsetýge úndeý tastady. Sóıtip, túngi saǵat 3:00-den jastar mejeli jer­ge qaraı aǵyldy. Aqyrynda saraıda 300-ge jýyq adam A.Zaıchıkovtiń ónerin demin ishine tartyp kórdi. Sportshy baǵyndyrǵan salmaqty ózderi kóterip jatqandaı sezinip, onyń árbir áreketin ekran arqyly kirpik qaqpaı baqylady. Julqa kóterýden 193 kılo ziltemirdi basynan asyryp tastaǵanynda tutas zal shýlap ketti. Birin-biri qushaqtap, Zaı­chıkov­tiń jetistigimen qut­­tyq­­tap máre-sáre bolysty. Ser­pe kóterýden alǵashqy tapsyry­syn 223 kılo dep kórsetkende, jan­­kúıer­ler Aleksandrdyń júl­deli oryn­ǵa umtylǵanyn anyq baı­qady. Alǵash­qy tapsyrysty min­siz oryn­daǵan­d­a, jıylǵan jurt­shylyq dúr ete qaldy. Al ekinshi tapsyrysty oryn­daı almaǵanda, tutas zal dúrligip ketti. Alaıda, úshinshi talpynysynda 227 kılo­ny baǵyndyrǵanda, tóreshiler onyń bul talpy­ny­syn eseptemeı tas­tady. Jan­kúıer­lerdiń kóńili sý sepkendeı basyldy. Degenmen, Zaıchıkov qossaıystyń nátıjesinde 416 kılony baǵyndyryp, qola júldege ıe bolǵanda, jankúıerlerdiń qýany­shynda shek joq edi. О́ıtkeni, eki bir­deı sańlaǵyn Olımpıa­da­ǵa qosa almaı, ishteı býlyǵyp júrgen jurt­­shy­lyqqa Zaıchıkov ıelengen «qolanyń» qadiri «altynmen» para-par bolatyn.  Erjan BAITILES, «Egemen Qazaqstan» QYZYLORDA Otgonseseg GALBADRAH Dzıýdoshy. Sport sheberi. Shymkent qalasy 1992 jyly 25 qańtarda Mońǵolııa astanasy – Ulan-Batyr qalasynda týǵan. 2015 jyldyń qańtarynan beri Qazaqstan Respýblıkasynyń azamaty. – Olımpııalyq oıyndardyń qola júldegeri (Rıo-de-Janeıro, 2016), 48 kg; – Álem Kýbogynyń kúmis júldegeri (Tashkent, 2012), 48 kg; – Álem Kýbogynyń qola júldegeri (Tashkent, 2011), 48 kg; – Eýropa ashyq chempıonatynyń kúmis júldegeri (Bratıslava, 2013), 48 kg. Jattyqtyrýshysy: Enhbatar Dashjams. Dzıýdoshy Otgonseseg Galbadrah Qazaqstan quramasynyń Rıo-de-Janeırodaǵy Olımpııalyq oıyndardaǵy naǵyz aqjoltaı sportshysy boldy. Tatamıdegi taıtalasqa 48 kıloǵa deıingi tarlandar arasynda qosylǵan ol jarystyń birinshi kúni qorjynyna alǵashqy medal saldy. Sol-aq eken, Otgonsesegtiń qola medalin artynsha Eldos Smetov kúmis medal etip qaıtardy. 24 jastaǵy dzıýdoshy qyz Qazaqstanǵa osy Olımpııalyq oıyndarǵa qatysý maqsatynda keldi. Sebebi, onyń elinde bul salmaqta Ýranseseg Mýnhbat esimdi myqty palýan bar edi. Sondyqtan 2015 jylǵy maýsymda Qazaqstan azamattyǵyn aldy. 2016 jylǵy aqpannyń basynda Parıjde Otgonseseg iri halyqaralyq «Úlken dýlyǵa» týrnırinde sensasııalyq jeńiske qol jetkizdi. Sol aıdyń ortasynda  Dıýsseldorf (Germanııa) qalasynda álemdik Gran-prı kezekti kezeńinde kúmis medal aldy. Budan buryn 2015 jylǵy qarashada ol Sındao qalasynda dzıýdo boıynsha kezekti gran-prıdiń kúmis júldegeri atanǵan. Rıo-de-Janeıro qalasynda Galbadrah úshinshi oryn úshin kúreste kýbalyq Mestre Alvaresti ıppon ádisimen jeńip, jeńisti joldy bastap berdi. Ol ekinshi beldesýinde japon Amı Kondodan aılasyn asyra almaǵan. Osylaısha ol  bas júlde úshin talasqa túsý múmkindiginen aıyrylyp qalǵan. Al birinshi aınalymda Otgonseseg gvıneıa-bısaýlyq Tasıana Lımany aıqyn basymdyqpen utqan edi.  Murat AITQOJA Karına Havajevna GORIChEVA Aýyr atlet. Halyqaralyq dáre­jedegi sport sheberi Taldyqorǵan qalasy Qazaq memlekettik qyzdar peda­go­gıkalyq ýnıversıtetiniń stýdenti. 1993 jyly 8 sáýirde Taldyqorǵan qalasynda týǵan. – Olımpııalyq oıyndardyń qola júldegeri (Rıo-de-Janeıro, 2016), 62 kg; – Ýnıversıadanyń kúmis júldegeri (Qazan, 2013), 63 kg. Jattyqtyrýshysy: Vıktor Alek­seevıch Nı. Jetisý jeriniń 23 jastaǵy túlegi Karına Gorıcheva 63 kıloǵa deıingi salmaqta Rıo tuǵyrynda qola medalǵa qol jetkizgende, mundaǵy kópshilik ony bir jaǵy zańdylyq sanady. Olaı deıtinimiz, aýyr atletıkaǵa keshteý, 15 jasynda kelgen jasóspirim qyz sodan keıin kóp uzamaı ózin iri jarystarda tanyta bastaǵan edi. Karına ziltemirdi qaqpaqyldaı bastaǵanyna úsh jyl bolǵanda, 2011 jyly jasóspirimder arasyndaǵy Álem chempıonatynda kúmis medal aldy. Kelesi jyly qola medaldiń ıegeri atandy. Al 2013 jyly Ýnıversıadanyń kúmis medaline qol jetkizdi. Osy jyly álem birinshiliginde 107+135=242 kılo kórsetkishpen tórtinshi orynnan tabyldy. Sodan keıin 2014 jyly Álem chempıonatynda julqa kóterýde altyn medaldy ıelendi. 2015 jylǵy Álem chempıonatynda úzdik úshtiktiń qataryna endi. Endi, mine, osydan keıin Rıo Olımpııalyq oıyndarynda úshtiktiń qatarynan tabylýy onyń osy joldaǵy baǵytynyń durys ekenin kórsetip berdi. Nurbol ÁLDIBAEV, «Egemen Qazaqstan» TALDYQORǴAN Darıǵa Oralqyzy ShÁKIMOVA Boksshy. Sport sheberi Almaty qalasy 1988 jyly 20 qarashada Petropavl qalasynda týǵan. – Olımpııalyq oıyndardyń qola júldegeri (Rıo-de-Janeıro, 2016), 75 kg; – Azııa chempıony (Astana, 2010) 75 kg. Jattyqtyrýshysy: Vıktor Edýardovıch Prısıajnıýk. Qazir Almaty qalasynyń atynan synǵa túsip júrse de, boksshy Darıǵa Shákimovany Soltústik Qazaqstan oblysynyń jurtshylyǵy óz adamyndaı kóredi. Sebebi, ol Petropavl qalasynda týyp-ósken. Osynda mektepte oqyp júrgen kezinde boks seksııasyna barǵan. Aldymen kıkboksıngpen aınalysyp kóripti. Anasy Zeıneppen habarlasqanymyzda, ol munyń aldynda jattyqtyrýshylary aıtqan áńgimeni túgeldeı rastap berdi. О́kinishtisi, qyzynyń osyndaı dańqqa jetip jatqan kezin ákesi Oral kóre almaı ketipti. Darıǵa oblys ortalyǵynan shetkerileý ornalasqan «Zarechnyı» shaǵyn aýdanyndaǵy № 13  mektepte oqyǵan. Ony birge oqıtyn qurbysy Lııa Shaıdýllına bir kúni kıkboksqa alyp kelipti. Basynda denesi tolyqshalaý qyzdy jattyqtyrýshy da qalaı qoımaǵanǵa uqsaıdy. Biraq ol talapty shákirt bolyp shyqty. Talapty qyz 2003 jyly kelgen betinen ózin jaqsy jaǵynan kórsetedi. Tynymsyz jattyǵýdyń, shúmektep ter tógýdiń arqasynda  qımyly shırap, gúrzi soqqylarymen erekshelenedi. Kelesi jyly kıkboksıngten ótken oblystyq chempıonatta qarsylas shydatpaıdy. Al 16 jasynda Qazaqstan birinshiligine qatysyp, ekinshi orynǵa  ıe bolady. Keıinirek, 2005 jyly Darıǵa ózimen birge jattyǵyp júrgen 10 qyzben birge Serik Bekturǵanov júrgizetin boksqa aýy­sady. Ol kóp uzamaı munda da chempıon atana bastaıdy. Osylaısha 64, 69, 75 kılo salmaq dárejeleri boıynsha elimizdiń 7 dúrkin chempıo­ny atanady. Azııa tórinde 1 ret altyn júlde alsa, Á.Moldaǵulovany, M.Mámetovany, H.Dospanovany es­ke alýǵa, Serik Qonaqbaevtyń júl­de­sine arnalǵan halyqaralyq týrnırlerde jasyndaı jar­qyl­daıdy. Darıǵa Qytaıdyń Ýlanchab qalasyna óz kúshine senip bardy. Bapkerlerdiń tapsyrmalaryn oıdaǵydaı oryndap,  75 kılo salmaq dárejesinde qorjynǵa jalǵyz altyndy saldy.  Fınalda qytaılyq Lı Kıýandy 3:0 esebimen jeńip, ekinshi ret «sary qurlyqtyń» chempıony tájin kıdi. Qyzdar arasynda Olımpıada  lısenzııasyn jeńip alǵan alǵashqy boksshy boldy. Rıonyń jartylaı fınalynda London Olımpıadasynyń, álemniń eki dúrkin jeńimpazy AQSh boksshysy Klaressa Shıldspen qolǵap túıistirdi. Jekpe-jek barysynda ol ózin ataqty áriptesimen teń dárejede óner kórsete aldy.  О́mir ESQALI,  «Egemen Qazaqstan»  PETROPAVL Elmıra Ánýarbekqyzy SYZDYQOVA Balýan. Sport sheberi Qaraǵandy qalasy Qaraǵandy ekonomıkalyq ýnıver­sıtetiniń stýdenti. 1992 jyly 5 aqpanda Soltústik Qazaqstan oblysy, Aıyrtaý aýdany, Kamennyı brod aýylynda týǵan. – Olımpııalyq oıyndardyń qola júldegeri (Rıo-de-Janeıro, 2016), 69 kg; – Azııa chempıonatynyń kúmis júldegeri (Doha, 2015), 69 kg; – Azııa chempıonatynyń kúmis júldegeri (Bangkok, 2016), 69 kg; – Azııa chempıonatynyń qola júldegeri (2014, As­tana), 69 kg. Jattyqtyrýshylary: Vladımır Staroselskıı, Vladıs­lav Sýtormın. Rıoda qaraǵandylyq balýan qyz Elmıra Syzdyqova áýeli mońǵol Ochırbatyn Nasanbýrmamen boz kilemge shyqty. Asa tartysty ótken kúres 2:2 esebimen teń aıaqtaldy. Tóreshiler aqyldasa kelip, kilem ústinde belsendiligimen kózge túsken bizdiń balýanǵa bir upaıdy artyq berip, jeńisti qolyna ustatty. Qarsy aldynan jarq etip juldyzy janǵan Elmıra kúshine minip, qola medal úshin bolǵan beldesýde Mysyr eliniń balýan qyzy Enas Mostafa Iýssef Ahmedti 7:4 esebimen bet qaratpaı utty. Sóıtip, Qaraǵandynyń qaısar qyzy jeńis tuǵyrynyń úshinshi satysyna kóterilip, Qazaq eliniń júlde qorjynyna 12-shi medaldi saldy. «Baqyttan basym aınalyp tur. Maǵan sengen, qoldaǵan jurttyń barshasyna aıtar alǵysym sheksiz! Olımpıadadaǵy beldesýlerdiń barlyǵy da óte aýyr boldy. Ásirese, Mysyr eliniń balýanymen qola medal úshin bolǵan beldesý qıynǵa soqty. Biraq jattyqtyrýshylardyń taktıkalyq turǵyda bergen tapsyrmalarynyń arqasynda men jeńip shyqtym. Qazaq eline rahmet», dedi sol sátte jýrnalısterge bergen suhbatynda Elmıra Syzdyqova. Ol óziniń 24 jasyna deıin kúres áleminde talaı bıikterdi baǵyndyryp úlgergen qyz. 2012 jyly jasóspirimder arasynda Azııanyń chempıony atandy. Arada bir jyl ótkende Golden Gran-prı-2013 týrnıriniń kúmis júldegeri boldy. 2014 jyly eresekter arasynda Azııa chempıonatynda baq synap, júldeli úshinshi oryn aldy. Sol jyly Mońǵolııada ótken Gran-prı jarysynda qarsylastarynyń bárin jeńip, altyn medalǵa qol jetkizdi. Bir jyldan keıin Azııa chempıonatynda fınalda ǵana qarsylasyna jol berdi. Bıylǵy jyl Elmıra úshin asa tabys­ty jyldardyń biri boldy. Aldymen ol I.Iаrygınniń júldesi úshin ótken Gran-prı týrnırinde top jarsa, odan keıin Azııa chempıo­natynda taǵy da kúmis júldege ıe boldy. Al 18-20 naýryzda Astanada ótken lısenzııalyq týrnırde sátti óner kórsetken Elmıra Rıo-2016 Olımpıadasynyń joldamasyn jeńip alǵan bolatyn. Jalpy, Elmıra 69 kılo salmaqta elimiz boıynsha óziniń myqtylyǵyn kilem ústinde talaı márte dáleldegen balýan. Mysaly, ol Taraz qalasynda ótken Qazaqstan chempıonatynda óz salmaǵyndaǵy 14 balýannyń ishinen úzdik shyqqan bolatyn. Elmıra Syzdyqova sportpen birge bilimdi de qatar alyp júrgen aqyldy qyzdardyń biri. Ol E.Bóketov atyndaǵy QarMÝ-dyń dene tárbıesi jáne sport fakýltetin támamdaǵan. Qazir Qaraǵandy ekonomıkalyq ýnıversıtetinde ekinshi joǵary bilim úshin oqyp júr. Bos ýaqytynda balýan qyz as pisirgendi, kitap oqyǵandy jaqsy kóredi eken. Olımpıadaǵa attanar aldyndaǵy suhbatynda ol túrik jazýshysy Orhan Pamýktiń shyǵarmashylyǵyna qyzyǵýshylyq tanytyp júrgenin aıtqan edi. Qaırat ÁBILDINOV, «Egemen Qazaqstan»  QARAǴANDY Farhad Ibragım HARKI Aýyr atlet. Sport sheberi Aqtóbe qalasy Almaty týrızm jáne sport akademııasynyń stýdenti. 1991 jyly 20 sáýirde Qyr­ǵyz­stannyń Toqmaq qalasynda týǵan. 2008 jyldyń qańtary­nan beri Qazaqstan Respýb­lı­kasynyń azamaty. – Olımpııalyq oıyndardyń qola júldegeri (Rıo-de-Janeıro, 2016), 62 kg. Dúısenbi kúni Aqtóbe áýejaıynda jergilikti turǵyndar Olımpııa oıyndarynyń qola júldegeri, aýyr atlet Farhad Harkıdi qarsy aldy. Sportshyny áýejaıdan oblys ákimi Berdibek Saparbaev kútip aldy. Keshki saǵat segiz shamasynda áýejaı aldyndaǵy alańda án oınap, merekelik kóńil kúı sharyqtap turdy. Olımpıada júldegeriniń Aqtóbege kelýin jattyqtyrýshylar, sport ardagerleri, jas sportshylar men jankúıerler asyǵa kútti. Jastar patrıottyq naqyshta jazylǵan plakattaryn kóterip: «Alǵa, Qazaqstan!», «Farhad – chempıon!», dep urandatýmen boldy. «Biz Olımpııa oıyndarynda sportshylardyń tartysty kúresin tamashalap, elimizdiń quramasyna birge jankúıer boldyq, – dedi aımaq basshysy. – Qazaqstan komandasy laıyqty nátıje kórsetip, eki júz memlekettiń ishinen 22-shi orynǵa qol jetkizdi. Bul úlken jetistik. Aýyr atletıkadan qola medalǵa ıe bolyp, oblysymyzdyń abyroıyn asqaqtatqan Farhad Harkıdiń jeńisine qatty qýanyshtymyz. Bul jeńis úlken jetistikterdiń bastamasy bolatynyna jáne Tokıodaǵy kelesi Olımpııa oıyndarynda aqtóbelikter keremet nátıje kórsetetinine senemiz. Bizdiń balalarymyz ben jastarymyz Farhad sekildi sportshylarymyzǵa eliktep, kóbirek sportpen shuǵyldanyp Olımpıada, Álem, Eýropa jáne Azııa chempıonattarynda top jarady dep úmittenemin». Saltanatty shara Qazaqstannyń Tuńǵysh Prezıdenti atyndaǵy Ortalyq mádenıet jáne demalys saıabaǵynda jalǵasty. Ol jerde sportshyny qala ákimi quttyqtady. «Farhadty jáne aqtóbelikterdiń barlyǵyn shyn júrekten quttyqtaımyn. Olımpııa oıyndarynda Qazaqstan quramasy 17 medal ıelendi. Bul elimiz úshin medal sany jaǵynan rekordtyq kórsetkish. Farhad Harkı sekildi sportshylardyń arqasynda odan da bıik jetistikterge qol jetkizemiz dep oılaımyn», dedi Ilııas Ispanov. Sondaı-aq, sport ardagerleri Qadyrjan Izǵarın men Vladımır Korenkov jáne oblystyq Beıbitshilik pen kelisim keńesi fılıalynyń tóraǵasy Keldibaı Espaǵambetov ózderiniń quttyqtaý sózderin jetkizdi. Kórsetilgen zor qoshemetke qaramastan, 25 jastaǵy Olımpıada júldegeri ózin qarapaıym ustady, nıet bildirgenderdiń barlyǵymen sýretke túsip, suraqtarǵa yntalana jaýap berdi. «Aqtóbege medalmen oralǵanyma qatty qýanyshtymyn. Týystaryma, jattyqtyrýshylar men barlyq jankúıerlerge qoldaý kórsetkenderi úshin úlken alǵys aıtamyn. Bul sizderdiń jeńisterińiz! Alǵa, Qazaqstan!», – dep urandatty halyqtyń ystyq yqylasyna bólengen sportshy. Aıdar О́RISBAEV, «Egemen Qazaqstan»