Danııar Maratuly ELEÝSINOV
Boksshy. Eńbek sińirgen sport sheberi.
Astana qalasy
1991 jyly 13 naýryzda Batys Qazaqstan oblysy, Qaztalov aýdany, Qaıyńdy aýylynda týǵan.
– Olımpııalyq oıyndardyń chempıony (Rıo-de-Janeıro, 2016), 69 kg;
– Álem chempıony (Almaty, 2013), 69 kg;
– Álem chempıonatynyń kúmis júldegeri (Doha, 2015), 69 kg;
– Azııa oıyndarynyń chempıony (Gýanchjoý, 2010), 69 kg;
– Azııa oıyndarynyń chempıony (Inchhon, 2014), 69 kg;
– Azııa chempıony (Amman, 2013), 69 kg;
– Azııa chempıony (Bangkok, 2015), 69 kg.
Jattyqtyrýshysy: Marat Tálipuly Eleýsinov.
Sol kúni Rıodaǵy bul jekpe-jekti bárimiz kórdik. Sebebi osynyń aldynda jartylaı fınaldyq shaıqasyn fransııalyq Sýleıman Sıssokomen ótkizgen Danııardyń qabaǵy jarylǵany qatty alańdatyp edi. Ekinshi raýndta dárigerlerdiń sheshimimen toqtatylǵan sol jekpe-jektiń bizdiń kapıtannyń paıdasyna sheshilgeni qandaı jaqsy boldy.
Sondyqtan osyndaı qıyndyqpen fınaldyq aıqasqa shyqqan 69 kıloǵa deıingi tarlanymyzdyń urysyn tapjylmaı otyryp kútken edik. Al Danııar Eleýsinov bizdiń bárimizdiń sol úmitimizdi aqtady. Ol ózimen altyn medal úshin talasqa túsken ózbek boksshysy Shahram Gııasovty esh kúmánsiz jeńdi. Sondyqtan tóreshiler oǵan jeńisti bir aýyzdan berdi. Esep – 3:0 (29:28, 29:28, 29:28). Osy shaıqasta Danııardyń úsh raýnd boıy aldynda alyp qalǵan jaraqatyna soqqy tıgizbeı, rıngte asa saýatty óner kórsetkeni mamandar men jankúıerlerdi erekshe tánti etti.
Bul Rıo olımpıadasyndaǵy Qazaqstannyń jalpy úshinshi, al bokstan qorjynǵa túsken alǵashqy da sońǵy altyn medali boldy. Sonymen birge Danııar bizdiń boksshylardyń 2004 jyly Afınada irge qalaǵan 69 kıloǵa deıingi salmaqta altyn medaldy jeńip alý dástúrin odan ári jalǵastyrdy. Ol sondaı-aq 1996 jyly Qazaqstan quramasy Olımpııalyq oıyndarǵa alǵash ret derbes komanda retinde qatysqan kezden bastap boksshylarymyzdyń keminde bir altyn medal alý úrdisin de jalǵap berdi. Qazaqstan boksshylary qatarynan besinshi Olımpıadada eń joǵary nagradaǵa qol jetkizdi. Bul altyn medal bizge sonysymen de qymbat!
Talǵat RAIYMBEK,
«Egemen Qazaqstan»
Nıdjat Álı oǵly RAHIMOV
Aýyr atlet. Halyqaralyq dárejedegi
sport sheberi
Atyraý qalasy
1993 jyly 13 tamyzda Ázerbaıjan astanasy
Baký qalasynda týǵan.
2014 jylǵy tamyzdan beri Qazaqstan Respýblıkasynyń azamaty.
– Olımpııalyq oıyndardyń chempıony (Rıo-de-Janeıro, 2016), 77 kg;
– Álem chempıony (Hıýston, 2015), 77 kg.
Jattyqtyrýshysy: Vıktor Alekseevıch Nı.
Eki jyldan beri Qazaqstan azamattyǵyn alyp, bizdiń elimizdiń namysyn qorǵap júrgen túbi atyraýlyq ulty ázerbaıjan aýyr atlet Nıdjat Rahımov Rıo-de-Janeıroda shyn máninde de aıdy aspannan bir-aq shyǵarǵandaı boldy. Saıysta 77 kıloǵa deıingi salmaqta synǵa túsken ol Qazaqstan quramasy qorjynyna alǵashqy altyn medaldy salyp, búkil eldiń eńsesin kóterip jiberdi. Muny sportshynyń ózi sol sátte qyzý qandy bı qımylymen aıshyqtap kórsetip berdi.
Nıdjattyń altyn tuǵyrda turǵan sátindegi jan tolqytar sátter esten ketpeıdi. Qazaqstan gımnin qosyla aıtyp turǵan onyń kózderi sol kezde botalap qoıa bergen edi.
Al sodan keıingi eń bir este qalarlyq sózi onyń endi Qazaqstannan ketpeıtini týraly málimdemesi boldy. «Ázerbaıjanǵa ketpeımin, onda tek qonaq bolyp qana baratyn shyǵarmyn», dedi qazaq eline kelip, baǵy janǵanyn jaqsy sezingen atlet. Ol bizdiń elimizge kelgen saparyn munyń aldynda, 2015 jyldyń qarasha aıynda AQSh-tyń Hıýston qalasynda ótken Álem chempıonatynda top jaryp shyǵýymen bastaǵan bolatyn. Endi, mine, Olımp shyńyn da baǵyndyryp úlgerdi.
Rıoda jýrnalısterdiń biri atyraýlyq atletke: «Eger otanyńa qaıta shaqyrsa, barasyń ba?» degen suraq qoıdy. Al Nıdjat sol tusta biz kútkendeı jaýap qaıtardy. «Joq, men Qazaqstanda qalamyn. Elge endi tek qonaq retinde baratyn shyǵarmyn, Qazaqstanǵa ábden úırenip qaldym», dedi ol qarapaıym ǵana.
Bul jaýap bizge aıryqsha unady.
Joldasbek ShО́PEǴUL,
«Egemen Qazaqstan»
Dmıtrıı Igorevıch BALANDIN
Sýda júzýshi. Sport sheberi
Ál-Farabı atyndaǵy Qazaq ulttyq ýnıversıtetiniń stýdenti.
1995 jyly 4 sáýirde Almaty qalasynda týǵan.
– Olımpııalyq oıyndardyń chempıony (Rıo-de-Janeıro, 2016), 200 m. brass;
– Azııa oıyndarynyń úsh dúrkin chempıony (Inchhon, 2014), 50 m., 100 m., 200 m. brass;
– Ýnıversıada chempıony (Kvandjýn, 2015), 100 m. brass; Ýnıversıadanyń qola júldegeri (Kvandjýn, 2015), 50 m. brass.
Jattyqtyrýshysy: Alekseı Nıkolaevıch Kazakov.
Sýda júzýshi Dmıtrıı Balandın sý sporty tarıhynda Qazaqstannyń Olımpııalyq oıyndardaǵy eń alǵashqy chempıony atanǵan sportshy boldy. Ras, 1956 jyly Avstralııanyń Melbýrn qalasynda ótken Olımpıadada Gennadıı Nıkolaev esimdi qazaqstandyq júzgish 4h200 metrlik estafetasynda qola medalǵa qol jetkizgen edi. Biraq Almatyda týyp-ósken sportshy sol joly alamanǵa Máskeý qalasynyń atynan barǵan bolyp shyqty.
Al bıylǵy 11 tamyz kúni almatylyq stýdent Dmıtrıı Balandın Rıodaǵy Oıyndardyń fınalyna shyqqan kezde qandaı qýandyq deseńizshi! Aıta keteıik, buǵan deıin brass ádisimen 100 metrge júzgen Dmıtrıı Balandın fınaldyq kezeńge deıin shyǵyp, sheshýshi synda nebári segizinshi oryn alǵan bolatyn. Alaıda sańlaǵymyzdan tap osyndaı erlikti kúte qoıǵan joqpyz. Ol bolsa sonyń bárinen joǵary deńgeıden kórinip, 200 metrge brass ádisimen júzýde sensasııa jasap, Oıyndardyń chempıony atandy. Ol, synda 2:07,46 mınýt ýaqyt kórsetkishimen top jardy.
«Almatynyń altyn balasy» bul tabysqa jetý jolynda 2014 jyly aldymen Ońtústik Koreıanyń Inchhon qalasynda ótken Azııa oıyndarynda úsh altyn medal, 2015 jyly sol eldiń Kvandjýn shaharynda oınalǵan Ýnıversıadada bir altyn, 1 qola medalǵa qol jetkizgen bolatyn.
Brazılııa jerindegi básireli básekede Balandınnen keıingi ekinshi oryndy amerıkalyq Djosh Perno alsa (2:07,53), úzdik úshtikti 2:07,70 ýaqytymen Reseı ókili Anton Chýpkov tııanaqtady.
Talǵat SÚIINBAI,
«Egemen Qazaqstan»