Arııa Permana esimdi 10 jasar ındonezııalyq bala sabaqtan qalyp qoımaý úshin eki aptanyń ishinde 5 kılo salmaqtan aryldy. Osylaısha, álemdegi eń tolyq bala sanalatyn Arııanyń salmaǵy 230 kılodan 225 kıloǵa tómendepti.
Arııanyń shekten tys tolyqtyǵy týraly buqaralyq aqparat quraldary buryn da habarlaǵan-dy. Ásirese, bıyl jazǵy demalys kezinde onyń óz erkimen júrip-turýy qıyndap ketken eken. Synyptastarymen birge mektepke bara almaı qalýy múmkin ekenin túsingen bala kún saıyn birneshe saǵat jaıaý júrip, qunary az tamaq jep, aryqtaýdyń qamyna kirisýge májbúr bolypty.
– Arııanyń minez-qulqy, tábeti basqa balalardan onsha erekshelenbeıdi. Nege tez salmaq qosatynyn bilmeımiz. Jergilikti dárigerler de densaýlyǵynda eshqandaı aýytqý joq ekenin aıtty, – deıdi onyń anasy.
Arııa qarapaıym fermerdiń otbasynda týǵan. Ata-anasy balalaryn jergilikti dárigerge qaratý úshin jurttan qaryz alýǵa májbúr bolypty. Balany sheteldegi myqty aýrýhanalarǵa aparyp, densaýlyǵyn teksertýge jaǵdaılary joq.
Nurhan SAMARHAN