Fýtboldan Qazaqstan quramasy búgin Bishkekte Qyrǵyzstan bas komandasymen ótken joldastyq kezdesýde 0:2 esebimen utylyp qaldy.
Alań ıeleri qonaqtar qaqpasyna ár taımda bir goldan soqty.
Matchtyń birinshi taımy qyrǵyzdardyń basymdylyǵymen ótti. Sondyqtan soǵylǵan gol sol shabýyldardyń zańdy nátıjesi bolyp tabyldy. Ony 43-mınýtta berilgen buryshtamany jaqsy paıdalanǵan Qyrǵyzstan quramasynyń qorǵaýshysy Valerıı Kıchın alystan uryp túsirdi.
Kezdesýdiń ekinshi taımynda Qazaqstan quramasy birqatar oıynshylardy almastyryp, shabýylda qarqyndy oınaı bastady. Alaıda, goldy olar emes, taǵy da alań ıeleri soǵyp ketti. 82-mınýtta Mırlan Mýrzaev esepti 2:0-ge jetkizdi.
Bul tizginin bas jattyqtyrýshy Talǵat Baısýfınov ustaǵaly bergi Qazaqstan quramasynyń birinshi jeńilisi boldy. Budan bólek, komanda Qyrǵyzstan fýtbolshylaryna osy joly alǵash ret utyldy. Eki qurama arasynda ótken buǵan deıingi 7 oıynnyń beseýinde qazaqstandyqtar jeńiske jetken bolsa, eki kezdesý teń aıaqtalǵan edi.
Qazaqstan terme jamaǵaty kelesi oıynyn 4 qyrkúıek kúni Astanada ótkizedi. Ol Polsha quramasyn qabyldaıdy. Osylaısha 2018 jylǵy álem chempıonatynyń irikteý týrnırin bastap ketedi.
Damır QOJAMQUL