Germanııanyń Oderdegi Frankfýrt qalasynda bokstan jastar arasynda dástúrli Brandenbýrg kýbogy aıaqtaldy. Osy dodaǵa Qazaqstannan 9 sportshy qatysyp, sonyń tórteýi jeńimpaz atandy.
Týrnırde Rýstam Hamıdov (49 kg), Aıdos Arapov (52 kg), Bek Nurmaǵambet (75 kg) pen Bekzat Nurdáýletov (81 kg) bas júldeni jeńip aldy. Odan basqa qurama komandanyń 3 boksshysy kúmis, eki sportshysy qola medal ıelendi.
Jalpykomandalyq esepte Qazaqstan komandasy ekinshi oryn aldy. Birinshi oryndy bes altyn júldemen Reseı boksshylary ıelense, úshinshi orynǵa bir altyn medal jeńip alǵan Germanııa quramasy ıe boldy.
Dastan KENJALIN