Qyrkúıek aıy – jazǵy demalystar aıaqtalyp, qyzý jumystyń qaınaıtyn shaǵy. Tabıǵattyń da jemisin bere bastaıtyn jomart kezi. Elimiz osy mańyzdy maýsymǵa jaǵymdy jańalyqtarymen qadam basty. Adamzat tarıhyndaǵy aıtýly oqıǵalardyń biri – Semeı ıadrolyq synaq polıgony jabylýynyń 25 jyldyǵy atap ótildi. Shartaraptan jınalǵan bedeldi saıasatkerler men sarapshylar Elbasy Nursultan Nazarbaevtyń osynaý erekshe erligine zor yqylas bildirdi. Ádettegideı Ata Zań merekesi toılandy. Al búgin qos palataly Parlament jańa jumys maýsymyna kiristi. Jaz boıy el aralap, saılaýshylarmen júzdesip qaıtqan Parlament depýtattary tyń kúshpen saıası ómirge aralasty. Alǵashqy qońyraý soǵylyp, jańa oqý jyly bastaldy. Tulymshaǵy jelbiregen talaı búldirshin mektep tabaldyryǵyn attady. Jaz boıy tańdaý jasap, mamandyq túgendegen talapkerler de joǵary oqý oryndaryna qadam basty.
Osyndaı aıtýly kúni el gazeti «Egemen Qazaqstan» da Táýelsizdiktiń torqaly toıyna tartý ispetti jańarǵan dızaınmen basylyp, oqyrmanǵa jol tartyp otyr. Ǵasyrlyq mejesine jaqyndaǵan qazaq baspasózi qarashańyraǵyndaǵy zaman talabyna saı jańalyqpen birge basylymnyń tuńǵysh bas redaktory Halel Esenbaev, odan keıin ár jyldarda basshylyq etken Bernııaz Kúleev, Smaǵul Sadýaqasov, Júsipbek Aımaýytov, Muhtar Áýezov, Turar Rysqulov qatarly arystar túren salǵan dástúrli joldy úzbeı, sabaqtastyqty saqtaýdy maqsat ettik.
Alash tusynda arab qarpimen jaryq kórgen basylym, keńestik kezeńde aldymen latyn, sosyn kırıll qaripterine kóship, maketin jańartqany belgili. Táýelsizdiktiń eleń-alańynda bas basylym Memleket basshysynyń qamqorlyǵymen tar jol, taıǵaq keshýlerden súrinbeı ótip, óziniń jańa kezeńine qadam basty. Sherhan Murtaza, Ábish Kekilbaıuly syndy tegeýrindi tulǵalar basqarǵan gazet – «Egemendi Qazaqstan», keıinirek «Egemen Qazaqstan» bolyp ózgerip, kezekti ret jańa sıpatta jaryq kóre bastady.
Búginde marketıng zańdylyǵynda belgili bir nátıjege qol jetkizý úshin rebrendıng jasaý qalyptasqan úrdis. «Egemen Qazaqstan» gazetindegi keshendi ózgerister de sondaı maqsattan týyndap otyr. Aıta ketý kerek, gazettegi jańalyqtar tamyz aıynda Aqparat jáne kommýnıkasııalar mınıstrliginiń bastamasymen qabyldanǵan Strategııalyq damý tujyrymdamasy boıynsha júzege asyrylýda.
Osyǵan baılanysty búginnen bastap «Egemen Qazaqstan» gazetiniń Astanadaǵy taralymy túrli-tústi bolyp shyǵa bastady. Al ózge óńirlerde polıgrafııalyq kásiporyndardyń múmkindigine qaraı tolyq tústige jańa jyldan bastap kóshiriletin bolady. Basylymdy gazet taratý jelileri arqyly kúndelikti bólshek saýdaǵa shyǵarý da josparlanyp otyr.
El gazetiniń syrtqy sıpatymen qatar, mazmundyq qurylymy da birqatar jańalyqtarmen tolyqty. Baspasóz tájirıbeleri eskerile otyryp, salalar boıynsha taqyryptyq better ashyldy. Ár bettiń turaqty baǵandarynda esimderi elge belgili azamattar men bilikti sarapshylar oramdy oılaryn ortaǵa salyp, paıymdy pikirlerimen bólisedi. Sonymen qatar, Qazaqstannyń halyqaralyq bedeliniń artýyna, elimizdiń BUU Qaýipsizdik Keńesiniń músheligine saılanýyna, keler jyly EKSPO kórmesiniń ótýine jáne taǵy basqa Elbasy bastamasymen júzege asa bastaǵan irgeli jobalarǵa oraı jahandaǵy jańalyqtarǵa baılanysty saraptamalyq maqalalarǵa kóbirek oryn berile bastaıdy.
Gazettiń basty qazynasy – oqyrmany. Sondyqtan mártebeli oqyrmanmen baılanysty nyǵaıta túsý basty nazarda bolady. El gazeti «Egemen» Sizderden hat-habarlaryńyzdy, paıymdy pikirler men utymdy usynystaryńyzdy kútedi.
Darhan QYDYRÁLI,
«Egemen Qazaqstan» respýblıkalyq gazeti» AQ Basqarma tóraǵasy