Parlament Senatynyń Tóraǵasy Qasym-Jomart Toqaev «Iаdrolyq qarýsyz álem qurý» halyqaralyq konferensııasyna qatysýshylarmen birqatar ekijaqty kezdesýler ótkizdi, dep habarlady Senattyń baspasóz qyzmeti.
Tóraǵa Bolgarııanyń Vıse-prezıdenti Margarıta Popovamen kelissóz júrgizip, antııadrolyq forýmdaǵy mazmundy ári jyly shyraıly sózderi jáne Prezıdent Nursultan Nazarbaevtyń «Álem. HHI ǵasyr» manıfesin belsendi qoldaǵany úshin meımanǵa alǵys aıtty. Q.Toqaev Bolgarııanyń ıadrolyq qarýdy taratpaý salasyndaǵy kúsh-jigeri men Iаdrolyq synaqtarǵa jappaı tyıym salý týraly sharttyń tezirek kúshine enýi qajettigine qatysty eldiń qaǵıdatty ustanymyn quptaıtynyn atap ótti. Taraptar Qazaqstan men Bolgarııanyń parlamentaralyq baılanystarynyń joǵary deńgeıin, sondaı-aq saýda-ekonomıka salasynda yntymaqtastyqty arttyrýdyń múmkindigi joǵary ekenin atap ótti.
Astana antııadrolyq konferensııasynyń qorytyndylary Q.Toqaevtyń Panafrıka parlamentiniń Prezıdenti Rodjer Nkodo Dangpen kezdesýinde de qaraldy. Q.Toqaevtyń pikirinshe, R.Dangtyń Semeı polıgonynyń jabylýyna 25 jyl tolýyna arnalǵan forýmdaǵy sózi Qazaqstan halqymen nıettestiktiń kórinisi ǵana emes, elimizdiń Afrıka elderimen qarym-qatynasyn nyǵaıtýǵa ıgi yqpal etetin bolady. Elimiz iri jáne yqpaldy aımaqtyq parlamenttik birlestik – Panafrıka parlamentimen tyǵyz baılanystar ornatýǵa yqylasty, dep atap ótti Senat Tóraǵasy.
Beıbitshilik pen qaýipsizdiktiń ózekti máseleleri, sondaı-aq halyqaralyq yntymaqtastyqty nyǵaıtýdaǵy zań shyǵarý organdarynyń róli Senat Tóraǵasynyń EQYU Parlamenttik Assambleıasynyń Vıse-prezıdenti, Ázerbaıjan Mıllı Medjlısiniń depýtaty Azaı Gýlıevpen, sondaı-aq Ońtústik Afrıka Respýblıkasy Parlamentiniń múshesi Iohannes Razerıtı Taýmen kezdesýinde talqylandy.
Sol kúni Q.Toqaev BUU Bas hatshysynyń Qarýsyzdaný máseleleri jónindegi burynǵy Joǵarǵy ókili Serhıo Dýarteni qabyldady.