Konstıtýsııa kúnine oraı Aqtóbe qalasynda birneshe áleýmettik nysan paıdalanýǵa berildi. Solardyń biri – qalaǵa qaraıtyn Kirpishti aýylyndaǵy 370 oryndyq orta mektep. 2015 jyly bastalǵan mekteptiń qurylysyn «Elıtstroıservıs» JShS bir jyldan sál astam ýaqytta salyp bitirdi. Mektep qurylysyna 526,9 mıllıon teńge qarjy bólingen. Úsh qabatty mektepte 58 ustaz eńbek etedi.
Mekteptiń saltanatty ashylýynda sóz alǵan oblys ákimi Berdibek Saparbaev jınalǵandardy Konstıtýsııa kúnimen quttyqtady.
– Elbasy jergilikti bılikke balalardy sapaly bilim alýy úshin barlyq jaǵdaıdy týǵyzýǵa tapsyrma berdi. Biz úsh aýysymmen oqıtyn jáne apatty jaǵdaıdaǵy mektepterdiń máselesin sheshýge baǵyt ustap otyrmyz. Osy maqsatta júıeli jumystar júrgizilýde. Mine, №18 orta mektepke jańa ǵımarat salynýy sonyń aıqyn aıǵaǵy. Endi bul mektep eki aýysymda oqytatyn bolady. Kúni keshe «NurAqtóbe» shaǵyn aýdanynda jańa mektep paıdalanýǵa berildi. Bul baǵyttaǵy jumystar alda da jalǵasyn tabady, – dedi ol.
Ata-analar atynan sóz alǵan Marat Babanaev osy mektepke nemeresin ákelip otyrǵanyn tilge tıek ete kelip, Elbasyna jáne oblys ákimdigine túıindi máseleni der kezinde sheshkenderi úshin alǵysyn bildirdi.
Sol kúni qala mańyndaǵy Qarǵaly aýylynda «Jarqyn bala» mektepke deıingi mekemesi óz esigin aıqara ashty. Balabaqsha aýmaǵy 1,3 gektar, qazirgi zamanǵa saı, tehnologııalyq jáne oıyn qural-jabdyqtarymen jaraqtanǵan. Jıhazdary mektepke deıingi jastaǵy balalarǵa saı, barlyq sanıtarlyq-epıdemıologııalyq talaptar saqtalǵan. Mekemede qazaq tilinde bilim beretin 16 top bar, onyń 2-eýi tilinde múkisi bar balalarǵa arnalǵan.
Oblys ákimi «KazPromStroıGrýpp» JShS salǵan balabaqsha ǵımaratyn qarap shyqty. Jańa mektepke deıingi mekemeniń qurylysyna respýblıkalyq bıýdjetten 560 mln teńge bólindi, 75 jańa jumys orny ashyldy.
– Elbasy óskeleń urpaqtyń tárbıesine basa nazar aýdarady. Táýelsizdik alǵannan beri óńirde mektepke deıingi mekemeler sany 8 ese ósip, 558-ge jetti. 46 myń sábı balabaqshaǵa barady. Osy jyly ashylǵan 32 balabaqshanyń 23-i memleket jáne jekemenshik aıasynda jumys jasap keledi. Jyl sońyna deıin, taǵy 20-syn paıdalanýǵa berýdi josparlap otyrmyz. 25 jyl ishinde 35 596 orynǵa arnalǵan 109 orta mektep salyndy. Tek osy jyly ǵana quny 4,7 mlrd teńge bolatyn 9 bilim berý nysanynyń qurylysy bastaldy, – degen B.Saparbaev óńirde taǵy 17 bilim berý nysanynyń ashylatynyn jetkizdi. Olardyń qatarynda 7 orta mektep, 1 otbasy úlgisindegi úı, 9 balabaqsha bar bolsa, sonyń 5-eýi jekemenshik bolyp tabylady.
Mereke kúni úı kezeginde turǵan 54 aqtóbelik KIK baǵdarlamasy boıynsha páterge ıe boldy. Oblys ákimi «KIK» AQ jelisi boıynsha baǵdarlamanyń qatysýshylaryna páter kiltin tabystady.
«Nurly Jol» baǵdarlamasy – bul halyqty qoljetimdi baspanamen tıimdi sharttar boıynsha qamtamasyz etetin memlekettik tetikterdiń biri. Jańa páterdiń ıeleri – jaldamaly turǵyn úıge kezekke turǵan qala turǵyndary.
Úsh qabatty úı mektebi men balabaqshasy bar, halyq kóp shoǵyrlanǵan aýdanda ornalasqan. Jalǵa berý kelisimsharty 20 jylǵa jasalady. Bul úıdiń 1 sharshy metriniń quny – 879 teńge. Bes jyldan soń jalǵa alýshy turǵyndar páterdiń qalǵan aqshasyn tólep, mezgilinen buryn satyp alýyna bolady.
Úıdiń qurylysymen aınalysqan bas merdiger – «Alym Injınırıng» JShS. Turǵyn úıdiń jalpy quny 508 mln teńgeden astam qarjy turady.
– Álemdik daǵdarysqa qaramastan, memleket barlyq áleýmettik mindetterdi oryndap, jeke turǵyn úıge qol jetkizý úshin barlyq jaǵdaıdy jasaýda. Búgin 50-den astam otbasy páter kiltine ıe boldy. Olardyń deni bıýdjettik sala mamandary. Biz osylaısha Elbasynyń qazaqstandyqtardyń turǵyn úı máselesin jaqsartý boıynsha tapsyrmasyn júzege asyryp jatyrmyz, – dedi óńir basshysy.
Satybaldy SÁÝIRBAI,
«Egemen Qazaqstan»
Aqtóbe oblysy