Aýyr atlet Jazıra Japparqul men dzıýdoshy Otgonseseg Galbadrahty qabyldaǵan Ońtústik Qazaqstan oblysynyń ákimi Beıbit Atamqulov Olımpııalyq oıyndardyń júldegerlerine laıyqty qurmet kórsetti. Rıo Olımpıadasynyń kúmis júldegeri Jazıra Japparqulǵa Shymkent qalasynan eki bólmeli páter men Toyota Land Cruiser 200 markaly djıp kóligi tartý etilse, qola medal ıegeri Galbadrah bir bólmeli páter men Toyota Prado mashınasyna ıe boldy.
Esterińizde bolsa, Qazaqstan qorjynyna eń alǵashqy medaldi baqytyn qazaq jerinen tapqan Otgonseseg Galbadrah salǵan bolatyn.
– Galbadrahtyń joly aqjoltaı boldy. Bizdiń memleketimiz Táýelsizdik alǵannan beri eń kóp medalǵa qol jetkizdi, – dedi aımaq basshysy. – Oblystyq sport jáne dene tárbıesi basqarmasynyń basshysy Álibek Nurtaev osy habardy telefon arqyly maǵan jetkizgende, erekshe qýandyq. Qos sportshymyzdyń jeńisi – tek ońtústikqazaqstandyqtar úshin ǵana emes, memleketimizdiń mereıi. Elimizdiń barlyq jankúıerleri tileýlerińizdi tilep, jeńiske jetkenderińizde sheksiz qýandy. Sondyqtan, bul syı-sııapatty barlyq qazaqstandyqtardyń tartýy dep qabyldańyzdar, – dedi ol.
Bul eki sportshy da «altynǵa» synyq súıem ǵana jetpeı qalǵan edi. Jazıra Japparqul qytaı atletinen julqa jáne serpe kóterýdi qosqanda, eki kılo ǵana qalyp ketti. «Áli tolyq jazylmaǵan jaraqattarym bar. Rıoda sonyń zardabyn tarttym. Endi ózime-ózim kelip alǵan soń jaraqattarymdy emdep, Tokıo Olımpıadasynyń «altyny» úshin daıyndalatyn bolamyn», – deıdi ol.
Al tatamıde nebir myqtylardyń aptyǵyn basqan Otgonseseg Galbadrah kelesi Olımpııalyq oıyndarynda «altyn» alýǵa jaǵdaıy ábden jetetinin sol joly tanytyp ketti.
Jazıra dańqty jeńisinen keıin jýrnalısterdiń kóz aldynda úı-ishimen sóılesti. Sonda: «Álfııa-aý, bul jeńisti sen úshin aldym ǵoı» degeni qulaqta jattalyp qalypty. Keıin bilsek, sportshynyń Álfııa degen 11 jasar jıen sińlisi serebraldy sal aýrýymen aýyrady eken. Ony shetelde emdetip, qatarǵa qosý – Jazıranyń armany. Sondyqtan, ózine berilgen syıaqyny sińlisin emdetýge jumsaıtynyn aıtqan.
Qazaqtyń aqkóńil qyzy ózine tıesili eki bólmeli páterdi ata-anasyna syılady.
Baqtııar TAIJAN,
«Egemen Qazaqstan»
Ońtústik Qazaqstan oblysy