Almatyda Olımpıadanyń altyn medalin ıelengen júzgish Dmıtrıı Balandın men qola júldesin jeńip alǵan Darıǵa Shákimovaǵa laıyqty syı-sııapat kórsetildi. Jınalǵan qaýym Qazaqstan tarıhynda sý sporty túrlerinen birinshi bolyp Olımpııalyq oıynda jeńiske jetken Dıma men eki márte Olımpıada chempıony, amerıkalyq Klaressa Shıldspen qaımyqpaı shaıqasqan Darıǵaǵa erekshe qurmet kórsetip, qol soqty.
Úkimettiń arnaı sheshimi boıynsha Olımpıadada birinshi bolǵan sportshyǵa 250 myń dollarlyq syıaqydan tys 3 bólmeli, úshinshi oryn alǵan sportshyǵa 50 myń dollardan bólek bir bólmeli páter berilýge tıis. Ońtústik astanada sol sheshimge saı talaptar júzege asty.
Saltanat ústinde sóz sóılegen qala ákimi Baýyrjan Baıbek:
– Qurmetti sportshylar, sizder Qazaqstan Táýelsizdiginiń 25 jyldyǵyna tuspa-tus kelgen Rıo Olımpıadasynda el namysyn qorǵap, elimizdiń kók Týyn kókke kóterdińizder,– dedi. – Almatylyqtar jáne barsha qazaqstandyq jankúıerler dúbirli kúnderi sizderge ár sát qoldaý kórsetti. Áýejaıda zor qýanyshpen qarsy aldy.
Sýda júzýshi Dıma men boksshy Darıǵanyń bapkerleri de qala ákimdiginde ótken saltanattan qur qol qaıtpady. Baýyrjan Baıbek olarǵa 3 mln jáne 2 mln teńge kóleminde syıaqy tapsyrdy.
Qala ákimdiginiń aldynda qyzyl lenta baılanǵan jol talǵamaıtyn qos kóliktiń kilti – Dmıtrıı Balandın («Toıota Land Krýzer-200») men Darıǵa Shákimovaǵa («Toıota Land Krýzer Prado-150») jınalǵan qaýymnyń dý qol shapalaǵynyń astynda berildi. О́z kezeginde sóz alǵan Darıǵa men Dıma Elbasy Nursultan Nazarbaevqa, qoldaý kórsetken barsha qazaqstandyq jankúıerge jáne búgingi kórsetilgen syı-sııapat úshin shyn júrekten alǵys aıtty.
Talǵat SÚIINBAI,
«Egemen Qazaqstan»
ALMATY