«Myzǵymas baýyrlastyq-2016» oqý-jattyǵýy aıaqtaldy
«Obýz-Lesnovskıı» 230-shy jalpyáskerı polıgonynda UQShU Ujymdyq bitimgershilik kúshteriniń (UBK) «Myzǵymas baýyrlastyq-2016» oqý-jattyǵýy aıaqtaldy. Oǵan Qazaqstan Respýblıkasy Qarýly Kúshteriniń bitimgershi áskerı qyzmetshileri qatysty.
Atalǵan oqý-jattyǵýda UQShU-nyń Ujymdyq bitimgershilik kúshteri alǵash ret BUU Qaýipsizdik Keńesiniń mandatyn aldy.
Oqý-jattyǵýdyń belsendi fazasynda bitimgershilik kontıngentterdiń is-qımyldaryn Qazaqstan Respýblıkasy Qorǵanys mınıstriniń birinshi orynbasary – Qazaqstan Qarýly Kúshteri Bas shtabynyń bastyǵy, general-polkovnık Sáken Jasuzaqov, UQShU-nyń Bas hatshysy Nıkolaı Bordıýja, UQShU Birikken shtabynyń bastyǵy, general-polkovnık Anatolıı Sıdorov, Armenııa men Belorýssııa qarýly kúshteri bas shtabtarynyń bastyqtary, Belarýs Respýblıkasynda akkredıttelgen áskerı-dıplomatııalyq korpýsynyń, Qyzyl Krest halyqaralyq komıtetiniń ókilderi jáne ózge de shaqyrylǵan meımandar qadaǵalady.
Bitimgershilik operasııada olardyń tapsyrmalar oryndaýy boıynsha belsendi is-qımyldar júrgizý kezinde ulttyq bitimgershilik kontıngentterdiń jaýyngerlik úılesimdiligine erekshe nazar aýdaryldy.
Oqý-jattyǵý sheńberinde BО́P-te qyzmet ótkerý, kólik quraldaryn tekserý tártibi, jaıaý patrýldeý, alǵashqy kómek kórsetý jáne bosqyndarmen (almastyrylǵan tulǵalarmen) jumys jasaý jóninde praktıkalyq sabaqtar ótkizildi. Áskerı qyzmetshiler lekterdi alyp júrý, mınasyzdandyrý, mobıldi BО́P quramynda qyzmet atqarý, mańyzdy nysandy kúzetý, eldi mekendi qorshaý jáne tekserý, ǵımaratqa shabýyl jasaý, mobıldi rezerv quramyndaǵy (tikushaqtardaǵy) is-qımyldar, izgilik kómek kórsetýdi qoldaý kezindegi is-qımyldardy pysyqtady.
Qazaqstandyq bitimgershiler Armenııa, Belorýssııa jáne Reseı qarýly kúshteriniń kontıngentterimen birlesip jaýapkershilik ýchaskelerine shyǵý jáne ornalasý boıynsha birqatar tapsyrmalardy pysyqtady. Osy ýchaskelerde barlaý, kúzetý, tekserý jáne oqshaýlaý is-sharalaryn oryndady.
Praktıkalyq is-qımyldar barysynda birneshe taktıkalyq epızodtar pysyqtaldy. Atap aıtqanda, kóliktik avıasııanyń kúshimen belgilengen aýdanǵa kontıngentterdiń materıaldyq quraldaryn jetkizý, tehnıkanyń lekterin qurý, qozǵalys baǵdarynda qoldan jasalǵan jarylǵysh qurylǵylardy kúzetý, anyqtaýdy uıymdastyrý, tikushaqtan mınasyzdandyrý toby quramynda túsirip jiberý jáne zańsyz qarýly quralymdy joıý, mańyzdy nysandy kúzetý jóninde tapsyrmalardy oryndaý pysyqtaldy.
Oqý-jattyǵýǵa UQShU-ǵa múshe barlyq alty memleketiniń qarýly kúshteri, ishki áskerleri men polısııasy quramynan 1500 áskerı qyzmetshi, sondaı-aq, 300 birlik avıasııalyq, brondy tankti jáne avtomobıldi tehnıka tartyldy.
«Egemen-aqparat»