Ǵylymy men bilimin damytqan el ǵana órkenıet kóshine ilese alady. Sondyqtan bolar, búgingi urpaqtyń bilim alýǵa degen qushtarlyǵy zor. Olardyń til bilýge jáne tehnıkalyq mamandyqtardy ıgerýge degen talpynysy joǵary. Bul rette lıseılerdiń, gımnazııalardyń, mamandandyrylǵan mektepterdiń alar orny aıryqsha. Solardyń ishinde O.Jáýtikov atyndaǵy Respýblıkalyq mamandandyrylǵan daryndy balarǵa arnalǵan fızıka-matematıka orta mektep-ınternatyn erekshe atap ótýge bolady. Aýylda nemese qalada turatyn kez kelgen ata-ananyń armany balasyn osy mektepte oqytý bolsa kerek. Atalǵan mektep Almaty qalasynda ornalasqandyqtan, soltústiktegi shákirtterge shalǵaı ekeni jasyryn emes. Biraq bıyldan bastap bul másele de sheshimin tapty. Olaı deıtinimiz, Almatydaǵy atalmysh bilim ordasynyń bólimshesi elordamyzda óz jumysyn bastady. Keshe osy bir oqý oshaǵyna Premer-Mınıstr Kárim Másimov arnaıy baryp, ujym jumysymen tanysyp qaıtty.
«Búgingi kúndegi úlken jańalyqtardyń biri Astanamyzda da osyndaı Respýblıkalyq biregeı fızıka-matematıka mektebiniń ashylýy. Atalmysh mekteptiń qabyrǵasy Almaty qalasynda 1972 jyly qalanǵany belgili. Muǵalimderi de bilikti mamandar. Oqýshylary da ozat. Olar ózderiniń qarym-qabiletin respýblıkalyq, halyqaralyq olımpıadalarda dáleldep júr. Aldaǵy ýaqytta da osyndaı jetistikteri kóp bolatynyna senemin», – dedi Bilim jáne ǵylym mınıstrliginiń mektepke deıingi jáne orta bilim departamentiniń dırektory Jańyl Alpysqyzy.
Fızıka-matematıka baǵytyn tereńdete oqytqan soń, bul mektepke artylatyn mindet te, kútiletin nátıje de joǵary bolmaq. Jalpy aýdany 12 104 sharshy metr bolatyn mektepte barlyǵy 58 muǵalim bilim beredi. Olardyń 2-ýi Qazaqstan Respýblıkasynyń «Úzdik pedagogi» ataǵynyń ıegeri, 4-ýi elimizdiń eńbek sińirgen ustazdary, 23-i joǵary kategorııaly muǵalimderi bolsa, 4 jas maman Nazarbaev Ýnıversıtetti támamdaǵan, 4-ýi Máskeý memlekettik ýnıversıtetin bitirgen bilikti mamandar ekenin aıta ketsek deımiz.
– Respýblıkalyq fızıka-matematıka mektebi elordada tuńǵysh ret ashylyp otyr. Sondyqtan, artylar júk te aýyr. Biraq bizdegi bilikti mamandardyń arqasynda biz bul mindetti abyroıly atqaramyz dep oılaımyn. Eldiń erteńi bilimdi jastar bolǵan soń, olarǵa sapaly bilim berip, sanaly azamat etip tárbıeleý muǵalimniń muraty bolý kerek. Biz bul mektepke oqýshylardy konkýrs arqyly qabyldadyq. Alǵashqyda 2000 úmitker nıet bildirdi, solardyń ishinen 884 oqýshy synaqtan súrinbeı ótip, júzden júırik, myńnan tulpar shyqty. Biraz oqýshylar súrindi. Kóbi demalysta bolyp, pándik materıaldardy umyta bastaǵan. Umytpaı, uqypty daıyndalǵandar bizdiń mektepte oqýǵa múmkindik aldy. Olardyń qatarynda 6 oqýshy respýblıkalyq jáne halyqaralyq olımpıadalardyń júldegeri», – dedi Respýblıkalyq fızıka-matematıka mektebiniń dırektory Ǵabıt Bekahmetov.
Sondaı-aq, atalǵan mektepte Premer-Mınıstrmen qatar, Bilim jáne ǵylym mınıstri Erlan Saǵadıev, Qarjy mınıstri Baqyt Sultanov, Aqparat jáne baılanys mınıstri Dáýren Abaev, Astana qalasynyń ákimi Áset Isekeshev boldy.
Raýan QAIDAR,
«Egemen Qazaqstan»