1992
* 10 tamyzda Prezıdent Nursultan Nazarbaev elimizge kelgen halyqaralyq Qyzyl Krest jáne Qyzyl Aı qoǵamdary federasııasynyń bas hatshysy Mıkael Steınbekpen kezdesti. Elbasy kezdesý barysynda barsha qazaqstandyqtardy, osy óńirdegi memleketterdiń halyqtaryn ǵana emes, búkil halyqaralyq qaýymdastyqty alandatyp otyrǵan Aral apatynyń planetalyq sıpaty bar ekenin atap ótti. Mıkael Steınbek óz kezeginde federasııa Qazaqstanǵa kórsetetin izgilik kómegin kúsheıtýge baǵyt alǵandyǵyn jetkizdi. Osy kúni Premer-Mınıstrdiń orynbasary M.Joldasbekov pen Mıkael Steınbek eki jaqtyń arasyndaǵy yntymaqtastyq týraly kelisimge qol qoıdy;
* 12 tamyzda Elbasy Jarlyǵymen Qazaqstan Prezıdentiniń janyndaǵy Konsýltasııalyq keńes quryldy. Memlekettik bılik pen basqarý organdarynyń qoǵamdyq-saıası uıymdarmen, ǵylym jáne mádenıet qaıratkerlerimen, halyqtyń túrli toptarynyń ókilderimen baılanystaryn qoldaý maqsatynda qurylǵan bul keńesshi organǵa respýblıkadaǵy áleýmettik-saıası úderisterge, qoǵamdyq pikirge taldaý jasaý, oqıǵanyń yqtımal órbý barysyn boljaý, saıası turaqtylyq pen ultaralyq kelisimdi qamtamasyz etýdiń strategııasy men taktıkasynyń negizin qalyptastyrý mindetteri júkteldi;
* 18 tamyzda Elbasynyń «Qazaqstan Respýblıkasynyń shekara áskerleri týraly» Jarlyǵy shyqty. Soǵan sáıkes, Qazaqstannyń shekara áskerleri qurylyp, ol tikeleı Ulttyq qaýipsizdik komıtetine (UQK) baǵyndyryldy.
* 19 tamyzda Qazaqstan Respýblıkasy Dúnıejúzilik densaýlyq saqtaý uıymyna múshe boldy;
* 25 tamyzda Prezıdent N.Á. Nazarbaevtyń «Áskerı ant týraly» Jarlyǵy shyqty;
* 27 tamyzda Almatyda Elbasynyń bastamasymen Taýly Qarabaqtaǵy qaqtyǵysty retteý máseleleri boıynsha úsh jaqty kelisimder bastaldy. Oǵan Ázerbaıjannyń, Armenııanyń jáne Qazaqstannyń Syrtqy ister mınıstrleri qatysty. Kelissózdiń birinshi týrynan keıin de, kelissóz aıaqtalǵannan keıin de oǵan qatysýshylardy Qazaqstan Prezıdenti N.Á.Nazarbaev qabyldap, búgingi tańdaǵy basty mindet qaqtyǵysty toqtatýdyń naqty joldaryn izdestirý ekendigin atap ótti. Ázerbaıjan men Armenııanyń syrtqy ister mınıstrleri Qazaqstan Prezıdentine bitimgershilik qyzmeti úshin alǵystaryn bildirdi. Kelissózdiń qorytyndylary boıynsha qol qoıylǵan memorandýmda eki eldiń mınıstrleri Ázerbaıjan men Armenııanyń soǵys qımyldaryn 1992 jyldyń 1 qyrkúıeginen bastap toqtatýǵa daıyn ekendikterin málimdedi. Bul merzim prezıdentter — N.Nazarbaev, Á.Elshibeı men L.Ter-Petrosıan arasyndaǵy ýaǵdalastyq boıynsha kelisildi.
*2 qyrkúıekte Qazaqstan Iskerlik yntymaqtastyq ortalyǵynda (burynǵy HShJK) osydan 80 jyl buryn jabylyp tastalǵan «Qarqara» jármeńkesi qaıta ashyldy.
*5 qyrkúıekte Almaty oblysynyń Jambyl aýdanynda Qazaqstan jáne Qyrǵyzstan prezıdentteriniń qatysýymen «Ar-namysym, qasiretim, maqtanyshym – Jeltoqsan!» atty jıyn bolyp ótti. Sharada N.Á.Nazarbaev: «О́zderińizge jaqsy málim, osydan alty jyl buryn qazaq halqynyń arqasyna aıazdaı batqan Jeltoqsan oqıǵasy bolyp ótti. Sol Jeltoqsanda uzaq jyldar boıy tunshyqtyrylyp kelgen ádilet sózi alǵash ret ashyq aıtylyp, jer betin jańǵyryqtaı sharlap ketti», – dedi. Sondaı-aq, Elbasy Jeltoqsan oqıǵasy kezinde qyrǵyz jastary da qyspaqqa túsken qazaq jastaryna qol ushyn berip, demeý bolýǵa umtylǵanyn, biraq zorlyqshyl júıe olardyń da aıaǵyn tusap, keıin qýǵyn-súrginge ushyratqanyn, qyrǵyz baýyrlarynyń qarlyǵashtyń qanatymen sý sepkendeı bolǵan adal nıetin qazaq halqy árqashan jadynda saqtaıtynyn atap kórsetti. Bul jóninde «Egemendi Qazaqstan» gazetiniń 8 qyrkúıektegi nómirinde «Ar-namysym, qasiretim, maqtanyshym – Jeltoqsan!» taqyrybymen maqala jarııalandy.
*14 kyrkúıekte Almatyda respýblıka ónerkásipshileri men kásipkerleriniń I sezi boldy. Sezde Prezıdent N.Á.Nazarbaev sóz sóıledi. «Halyqty naryqqa qazirdiń ózinde belsendi túrde daıyndaý kerek. Bul oraıda shamasy kelmeıtinderge, tipti kásipker bolǵysy kelmeıtinderge qamqorlyq jasaý kerek», – dedi Elbasy. Osy kúni Jeltoqsan oqıǵasynyń qurbany bolǵan Qaırat Rysqulbekovke, onyń týǵan jeri – Jambyl oblysy, Moıynqum aýdanynyń «Kókterek» keńsharynda eskertkish ashyldy.
*15 qyrkúıekte Qazaqstan Respýblıkasy Joǵarǵy Keńesiniń tóralqasy jekelegen ákimshilik-aýmaqtyq mekenderdiń atyn ózgertý týraly qaýly qabyldady. Aıta keteıik, osy qaýly boıynsha elimizdiń 7 oblysynda 29 eldi mekenge óziniń tarıhı, qazaqy ataýlary qaıtaryldy.
*16 qyrkúıekte Prezıdent N.Á.Nazarbaev 1992 jylǵy 13-15 jeltoqsan aralyǵynda Almaty qalasynda respýblıkada turatyn ulttar men ulystar ókilderiniń qatysýymen Qazaqstan halyqtarynyń forýmyn ótkizý týraly qaýlyǵa qol qoıdy. Osy forýmnyń negizinde keıin Qazaqstan halqy Assambleıasy quryldy.
*18 qyrkúıekte Prezıdent Jarlyǵymen «Qazaqstan» memlekettik teleradıo habarlaryn taratý kompanııasy quryldy. Onyń tóraǵasy bolyp Sherhan Murtaza taǵaıyndaldy. Al Mınıstrler Kabınetiniń qaýlysymen Ábish Kekilbaıuly «Egemendi Qazaqstan» gazetiniń bas redaktory bolyp bekitildi. Gazettiń 19 qyrkúıektegi nómirinde Sh.Murtaza men Á.Kekilbaıulynyń lebizderi jarııalandy;
*19 qyrkúıekte Máskeýde Reseı Prezıdenti Borıs Elsın men Qazaqstan Prezıdenti Nursultan Nazarbaevtyń jumys babyndaǵy kezdesýi ótti. Kezdesýde eki memlekettiń saıası, ekonomıkalyq jáne áskerı salalardaǵy erekshe qatynastaryn odan ári damytý máseleleri talqylandy.
*24 qyrkúıekte Qazaqstan Respýblıkasynyń Prezıdenti N.Á.Nazarbaevtyń Fransııaǵa resmı sapary kezinde eki eldiń qarym-qatynastaryn qalyptastyratyn birqatar mańyzdy qujattarǵa qol qoıyldy.
*28 qyrkúıek pen 4 qazan aralyǵynda Almatyda Dúnıejúzi qazaqtarynyń tuńǵysh Quryltaıy boldy. Al 30 qyrkúıekte Almatydaǵy Respýblıka saraıynda Dúnıejúzi qazaqtary Quryltaıynyń saltanatty májilisi ótip, onda Prezıdent N.Á.Nazarbaev sóz sóıledi. «Qadirmendi qaýym! Alystan kelgen aǵaıyn! Ardaqty otandastar! Búgingi kún – erekshe kún. Orta toldy degen osy. Dál osynaý sátte ózin qazaqpyn dep sezinetin árbir adam júregi lúpildep, atamekenine, táýelsiz Qazaqstannyń astanasy Almatyǵa kóz tigýde. О́ıtkeni, munda dúnıe júziniń túkpir-túkpirindegi ısi qazaq ataýlynyń ókilderi tuńǵysh ret bastaryn qosyp, alqaly jıyn, saltanatty májilis – Quryltaıǵa jıylyp otyr. Kúni keshe ǵana mundaı bolady degen oı kóbimizdiń qııalymyzǵa da kirmegen shyǵar. Endi, mine, ańsaǵan armannyń taǵy birine qol jetkizdik», – dedi Elbasy. Elbasynyń Quryltaıdaǵy sóılegen sózi «Egemendi Qazaqstan» gazetiniń 2 qazandaǵy nómirinde jaryq kórdi.