Qoldaryna ustaǵan alýan túrli gúlderindeı ózderi de qýanysh qushaǵyna enip, júzderi balbul janǵan oqýshylar keshe syńǵyrlaǵan alǵashqy qońyraý únine uıyp, altyn uıa mektepteriniń tabaldyryǵyn attady. Sondaı bir erekshe sát elordadaǵy №73 fızıka-tehnıkalyq lıseıinde de bolǵan edi. Eki jyldan beri jumys istep kele jatqan bilim uıasy talantty balalarǵa nárli bilim berýmen qatar, tálimdi tárbıe úıretýdi de joǵary dárejede atqaryp kele jatqanyna kýá boldyq. Ol, mekteptiń qol jetken jetistiginen, alǵa qoıǵan mindet-maqsattarynan aıqyn kórinip turdy.
Mektep dırektory Quralaı Baıtájikova jaz boıy demalysta bolyp, altyn uıasyna taban tiregen oqýshylarmen, olardyń ata-analaryn quttyqtaı kelip, bul sáýleli sát ár oqýshynyń, ásirese, birinshi synyp búldirshinderiniń esinde qalatynyn atap ótti.
– Bıylǵy jańa oqý jylyn da ótken jyldaǵydaı tabyspen aıaqtaý nıetindemiz. Ústimizdegi jyly Ulttyq biryńǵaı testke qatysqan túlekterimiz joǵary kórsetkishke qol jetkizip, elordadaǵy aldyńǵy lektegi 10 mekteptiń qatarynan tabyldy. Sonymen qatar, Respýblıkalyq pán olımpıadasyna alǵash ret qatysqan oqýshylarymyz matematıka, fızıka, hımııa pánderinen júldeger atandy. Ǵylymı jobalar jarysynda da báıgeniń aldynda keldi. Osy úrdis jańa oqý jylynda da jalǵasyn tabatynyna senimdimiz. Bizdiń mektepke qabyldanatyn ár talapker synaqtan ótedi. Bilimine sengen daryndy ul men qyzǵa árqashan esigimiz ashyq, – dedi Quralaı Amangeldiqyzy.
Fızıka-tehnıkalyq lıseıde oqıtyn oqýshylardyń uzyn sany 1361 eken. Birinshi synypqa kelgen 252 búldirshin qazaq úıdiń shańyraǵyn baqanmen bıikke kóterip turyp, Bilim kúnine arnalǵan taqpaqtaryn jatqa aıtyp, dóńgelene bı bılep, qaýmalaǵan jurtty rıza etti.
Súleımen MÁMET,
«Egemen Qazaqstan»