Táýelsizdiktiń 25 jyldyǵyna oraı Astana qalasynda «Qýatty óńir – qýatty Qazaqstan» atty Qyzylorda oblysynyń kúnderi ótedi.
«Alashtyń anasy» atanǵan Syr eliniń Astanadaǵy aýylsharýashylyq hám merekeli sharasy eki kúnge sozylady. Eń aldymen, qyzylordalyqtar aýylsharýashylyq jármeńkesin uıymdastyryp, óńirde óndiriletin taýarlaryn arzan baǵada elorda turǵyndaryna usynady. Onda Qyzylorda qalasy men 7 aýdannan 45-ke tarta ónim túrleri saýdaǵa túsedi. Naqtyraq aıtsaq, 70 tonna kúrish, 90 tonnaǵa jýyq kókónis, 70 tonna baqsha daqyldary, 33 tonna kartop, 20 tonna Aral teńiziniń balyǵy, 6 tonna alma jáne jemis-jıdekter, 4 tonna sút ónimderi jáne qymyz-shubat, 2 tonna bal, 3 tonna kondıterlik ónimder, 6 tonna et jáne shujyq ónimderi, 1 tonnaǵa jýyq ulttyq taǵamdar men 5 tonna Aral tuzy bar. Jalpy esepte jármeńkege Qyzylordadan 70 mln teńgeniń 400 tonnaǵa jýyq aýylsharýashylyq ónimderi ákelinedi.
Jármeńke aıasynda «Yrysty, kúrishti Qyzylorda» atty oblys ónerpazdarynyń konserti kórermen nazaryna usynylady. Sonymen qatar, Syr topyraǵynan shyqqan ataqty kúrishshi, Eki márte Sosıalıstik Eńbek Eri Y. Jaqaevtyń125 jyldyq mereıtoıy uıymdastyrylyp, «Aq kúrishtiń atasy – Ybyraı» atty kórme ótedi.
Shara aıasynda Astana qalalyq ortalyq kitaphanasynda «Syrdarııa kitaphanasy» serııasymen jaryq kórgen Syr boıy aqyn-jazýshylarynyń shyǵarmalarynan jáne óńirdiń áleýmettik-ekonomıkalyq damýyn kórsetetin kitaptardan quralǵan «Týy bıik, tuǵyry berik Syr eli» atty kitap kórmesi, Eýrazııa ulttyq ýnıversıtetinde «Táýelsizdik jyldaryndaǵy Syr óńiriniń jetken jetistikteri» taqyrybynda memleket jáne qoǵam qaıratkerleriniń stýdenttermen kezdesýi, Astana balalar aýylynda «Bári de bala baqyty úshin» atty qaıyrymdylyq sharasy, sondaı-aq, Kongress-holl foıesinde «Táýelsizdiktiń dara jolyndaǵy Syr eliniń jetistikteri» atty foto kórmesi men «Táýelsizdiktiń syrly boıaýlary» taqyrybynda oblys sýretshileriniń kórmesi uıymdastyrylady.
Aıta keteıik, arzan baǵadaǵy jármeńke B.Momyshuly dańǵylyndaǵy Oqýshylar saraıynyń alańynda ótedi.
Talǵat RAIYMBEK