máselesi oblysta tolyq sheshilip, 1200-deı oqýshy sabaqty jańartylǵan ǵımarattarda bastady
Bıyl óńirde 72 803 shákirt mektep tabaldyryǵyn attasa, 8 582-si alǵash ret partaǵa otyryp, kúmis qońyraý syńǵyryn estidi. Elimiz táýelsizdik alǵannan beri 37 bilim úıiniń boı kótergenin, byltyr apatty jaǵdaıda turǵan ǵımarattar jaıy birjola eńserilgenin eskersek, oqý-aǵartý salasyna memleket, jergilikti bılik tarapynan úlken kóńil bólinip otyrǵanyn ańǵarý qıyn emes. Bıylǵy jańa oqý jylyndaǵy basty jańalyqtardyń birine «Nurly Jol» ınfraqurylymdy damytý baǵdarlamasy aıasynda úsh aýysymmen oqytý jaıynyń túbegeıli sheshim tapqanyn atar edik.
Bul kúndi Ǵ. Músirepov aýdanynyń turǵyndary taǵatsyzdana tosqan bolatyn. О́ıtkeni, burynǵy aýpartkomnyń tar ǵımaratynda 400-ge jýyq oqýshynyń qysyla-qymtyryla otyrýlaryna týra kelgen. Ata-analar muńdaryn shaǵyp, talaı esikterdi jaǵalaǵanmen, ózekti problema saǵyzdaı sozylyp kelgen. Tek «Qazaqstan joly-2050: bir maqsat, bir múdde, bir bolashaq» Joldaýynda aıtylǵan 2017 jylǵa deıin eldegi barlyq mektepti eki aýysymmen oqytýǵa kóshirý týraly talaptardan keıin ǵana keshendi is-qımyldar baǵdarlamasy túzilip, 400 oryndy mektep úıin kóterýge 1 mıllıard 600 mıllıon teńge bólindi. Bas merdiger «Alfa-Sever» kompanııasy óz isin jaýapkershilikpen atqaryp, eki qabatty bilim úıin 1,5 jyldyń ishinde salyp bitirdi. Novoıshım qazaq orta mektebiniń ashylý saltanatyna aımaq basshysy Erik Sultanov qatysyp, ustazdar men ata-analardy aıtýly merekemen quttyqtady. Ol óz sózinde el Táýelsizdiginiń 25 jyldyǵy mereıtoıy qarsańynda Elbasy tapsyrmasy abyroımen oryndalǵanyn atap ótti. Birinshi synyp oqýshylaryna Prezıdent atynan «Meniń Otanym – Qazaqstan» kitabyn, mektep-ınternatqa «Gazel» avtokóliginiń kiltin tabys etti.
– Úsh aýysymda oqý oqýshylarǵa da, ustazdarǵa da aýyr soqqan. Búgingi qýanyshymyzdy aıtyp jetkizý qıyn. Fızıka, hımııa, bıologııa, ınformatıka, mýltımedııalyq kabınetterge sońǵy úlgidegi qural-jabdyqtar ornatylǵan. Aıyrtaý men Shal aqyn aýdandarynan da oqýshylar qatynaıdy. Olar 200 oryndy ınternatta turatyn bolady, – dedi jýrnalısterge bergen suhbatynda mektep-ınternattyń dırektory Sársengúl Súıesinova.
Budan bólek ashana, akt jáne sport zaldary, medısınalyq kabınet, kitaphana, ınternet-zal jumys isteıdi. Mektep janynda stadıon, monsha ornalasqan.
Qyzyljar aýdanyna qarasty Báıterek aýyly turǵyndarynyń da kópten kútken armany oryndaldy. Bul eldi mekendi «Oralmandar aýyly» dep te ataıdy. 7 jyl buryn otandastardy elge oraltý baǵdarlamasy sheńberinde osy jerge shetten kelgen aǵaıyndarymyz ornalasyp, jasyl jelek jamylǵan aýyl paıda boldy. Búginde munda 1 550-deı adam tursa, úshten birin 18 jasqa deıingiler quraıdy. 300-den astam oqýshynyń aýdan ortalyǵyna qatynap oqýy eńbek dese erinbeıtin, qıyndyqtan qaımyqpaıtyn úlkenderdiń qabaǵyna kirbiń uıalatatyn. Endi júzderine nur uıalap, qýanyshtaryn bir-birimen bóliskenshe asyq. Oblystyq bıýdjetten bólingen qarajattyń esebinen jarty jyldyń ishinde salynǵan 300 oryndy bilim ordasy óz esigin aıqara ashty. Osylaısha 53 muǵalim, 19 tehnıkalyq qyzmetker turaqty jumysqa ornalasty. Osyndaǵy saltanatty sharaǵa qatysqan E.Sultanov ustazdar aldynda bilim berýdiń jańa júıesin engizý, básekege qabiletti, bilimdi, bilikti urpaq tárbıeleý mindeti turǵanyn jetkizip, mektep ujymyna sý jańa avtobýstyń kiltin tartý etti.
– Mekteptiń boı kótergenine rızashylyǵymyzdy bildiremiz. Balalarymyz endi sýyqta búrseńdep, tońbaıtyn bolady. Olardyń sapaly bilim alýyna barlyq jaǵdaı jasalǵan. 5 nemeremniń bireýin birinshi synypqa, ekinshisin daıyndyq tobyna berdik. Qalǵandary joǵary synyptarda oqıdy. Alysqa aparý ábden qajytyp edi, aq túıeniń qarny jarylǵan osyndaı baqytty kúnge jetkenimizge sene alar emespiz, – deıdi aýyl turǵyny Meńdibaı Rahmetov.
5 bala tárbıelep otyrǵan Almagúl Partızannyń shattyqtan júzi alaýlap, janarynan ot ushqyndaıdy. Osynda jumysqa ornalasqanyna shúkirshilik etedi. Joldasy da elektrmen dánekerleýshi qyzmetine qabyldanypty. 52 muǵalimniń altaýy «Dıplommen – aýylǵa!» baǵdarlamasy boıynsha ornalasypty. Solardyń biri Sáken Qusaıynov M.Qozybaev atyndaǵy Soltústik Qazaqstan memlekettik ýnıversıtetin ınformatıka mamandyǵy boıynsha támamdap, joldamany osynda alypty. 4 kabınetke 48 kompıýter qoıylǵan. Bólmeler keń ári jaryq, deıdi jas maman. 120 oryndy ashananyń baǵasy qoljetimdi. Az qamtylǵan, turmysy tómen otbasylardan shyqqan 75 bala tegin tamaqtanady.
Mektep qurylysyna, jıhazdar, qondyrǵylar satyp alýǵa 825 mıllıon teńge jumsalypty.
Taıynshalyqtar da zamanaýı mektep úıiniń zaryn ábden tartqandardyń biri. Oqýshylar men ustazdar kóp jyl boıy eshqandaı talapqa saı kelmeıtin ǵımaratty panalaýlaryna týra kelgen. Qansha jerden jóndeý kórdi degenniń ózinde eskiniń jurnaǵy anadaıdan menmundalap turatyn. Qazaqsha dáris alatyn shákirtter osyndaı múshkil halde júrse de, úlgerimderin tómendetpedi. Qoǵamdyq belsendilikterin joǵaltpady. Birde jaqsy jańalyq jyl qusyndaı saǵyntyp jetti. Ásirese, muǵalimderdiń ábden zárezap bolyp qalǵandary sonshalyq, bastapqyda senbegen. Merdiger uıymdar men qurylysshylar iske bilek sybanyp, yldym-jyldym kiriskende ǵana úsh aýysymnyń azabynan qutylaryna kózderi jetip, kóńilderinde úmit oty oıanǵan. Záýlim saraı ispettes eki qabatty bilim úıi paıdalanýǵa berilgende qalyń jurtshylyq aýdan ortalyǵyndaǵy jalǵyz ulttyq shańyraqqa qaraı aǵylǵan. Ortaq qýanyshty bólisken turǵyndar balalarymyz eki aýysymda oqıtyn boldy desip, arqalarynan aýyr júk túskendeı jeńildenip sala bergen.
Saltanatty jıynǵa kelgen oblys ákiminiń birinshi orynbasary Aıdarbek Saparov qurylys jumystaryn der kezinde bitirgen «Osnovanıe» JShS basshylyǵyna alǵysyn arnap, jınalǵandardy aıtýly oqıǵamen quttyqtady. Jas urpaqtyń joǵary bilim jetistikterimen qýantaryna senim bildirip, «Gazel» kóliginiń kiltin tabystady.
Biz aýdandyq oqý bóliminiń basshysy Erkin Orazovty sózge tartqanymyzda ol burynǵy mektep úıi 100 ǵana oryndy bolsa, jańa ǵımarat 300 orynǵa laıyqtalǵanyn, oqýshylar sany 440 bolǵanyn, úsh birinshi synyp ashylǵanyn, 26 kabınet, 30 oryndy ınternat jumys isteıtinin jetkizdi. 46 muǵalim óskeleń urpaq tárbıesine atsalysatyn bolady.
О́mir ESQALI,
«Egemen Qazaqstan»
Soltústik Qazaqstan oblysy