Jańa ınnovasııalyq damý joly
Qytaı Halyq Respýblıkasynyń Tóraǵasy Sı Szınpınniń baspasóz máslıhatynda aıtqan «G20 sammıti tabysty ótti. Sońǵy eki kúnde jahandyq basqarý saıasatyn kúsheıtý, saýda men qarjy júıesin damytý jóninde pikirtalastar boldy. Sammıt qorytyndysy boıynsha qabyldanǵan kommıýnıke baǵdardy belgilep, maqsatty aıqyndady» degen sózin keltirgen.
«Biz álemdik ekonomıkanyń jańa ınnovasııalyq damý joly jóninde ýaǵdalastyq. Fıskaldyq jáne monetarlyq saıasatqa negizdelgen eski joldan aıyrmasy, bizge ósimdi ınnovasııa arqyly yntalandyrý qajet», dedi QHR Tóraǵasy.
Aqparat agenttigi sondaı-aq sammıtke qatysýshylar álemdik ekonomıka men qarjyny basqarý isin jaqsartý máseleleri boıynsha bir mámilege qol jetkizgenine nazar aýdaryp, «Biz álemdik sharýashylyqtyń ornyqtylyǵyn arttyrý úshin jahandyq ekonomıka men qarjyny basqarý isin jaqsartý týraly sheshim qabyldadyq. Kvotalar reformasyn jáne halyqaralyq qarjy ınstıtýttaryndaǵy daýystar bólinisin ilgeriletýge sheshim qabyldadyq. Halyqaralyq valıýta qory reformalar josparyn kestege sáıkes oryndaý maqsatynda jumys isteıtinine senim bildirdik», – degen Sı Szınpınniń sózine silteme jasaǵan.
Qazaqstan Prezıdentinen úlgi alý kerek
«Qazaqstan «Úlken jıyrmalyq» quramyna kirmeıdi, biraq Nursultan Nazarbaev Qytaı Halyq Respýblıkasynyń Tóraǵasy Sı Szınpın tarapynan «eki eldiń yntymaqtastyq deńgeıi joǵary bolýy sebepti» sammıtke shaqyryldy», – dep jazady portal. Atalǵan portal, sondaı-aq, Joǵarǵy Radanyń depýtaty Oleg Lıashkonyń Feısbýktegi jazbasyna silteme jasaı otyryp, onyń «Ýkraına bıligi Qazaqstan Prezıdentinen úlgi alýy tıis» degen sózin de keltire ketken.
Tarıhı betburysty kezeń
О́z elinde álemdik 20 iri derjavanyń basshylaryn qabyldaǵan Qytaı Halyq Respýblıkasynyń Tóraǵasy Sı Szınpın jınalǵandarǵa jahandyq ekonomıka tarıhı betburysty kezeńde turǵanyn málimdedi, dep habarlady VVS-diń Orys qyzmeti.
Osy jolǵy sammıttiń ekonomıkalyq mán-mańyzyna basa nazar aýdarǵan atalǵan aqparat quraly Qytaı kóshbasshysynyń «suranys quldyrap, saýda men ınvestısııa aǵyny báseńdeýi sebepti naryqtar turaqsyz bolǵan kezeńde «bos sózderden» qashqan jón» degen málimdemesin alǵa tartqan.
G20 sammıtinde jalpy ekonomıkalyq problemalarmen qatar bolat óndirý ındýstrııasyndaǵy daǵdarys, Brıtanııanyń Eýropalyq odaqtan shyǵýy, sondaı-aq, transulttyq korporasııalarǵa salyq salýǵa qatysty máseleler talqylandy.