«Kedeıdiń baı bolsam degeni jaqsy, al, baıdyń qudaı bolsam degeni qıyn» (Sherhan Murtaza). Oıbaı-aý, búginde baı bolsam dep kim armandamaıdy? Qazir jurttyń balasynyń bári joǵary bilim alýǵa qumar. Jastardyń kóbisi baılyq, nápaqa, mysh-mysh aqshanyń bári sol qarjyger, zańger, ekonomıst sekildi mamandyqtarda jatqandaı kóretini bar. Qazaqtyń balalary tabaqtaı dıplommen jumyssyz júrgende, ózge ulttyń balalary 6 aılyq kýrsty bitirip alyp, biri kompıýter jóndep, biri áınek salyp, temir dánekerlep, qubyr jóndep, tamaǵy toq, kóılegi bútin júredi. Osydan keıin jastarǵa kásiptik mamandyq beretin orta oqý oryndarynyń rólin arttyryp, kóbeıte túsý máselesi ózinen-ózi týyndaıtyny anyq.
Jalpy alǵanda kásiptik bilim beretin orta oqý oryndaryna jaqsy kóńil bólingen. Oblysta óńir qajettiligine saı jańa mamandyqtar ashylyp, hımııa, aýylsharýashylyq, qurylys, tehnıkalyq mamandyqtarǵa bólinetin memlekettik tapsyrys kólemi artyp keledi. Memlekettik kolledjderde daıarlanatyn mamandyqtardy belgili bir salaǵa baǵyttaý, ońtaılandyrý, olardy korporatıvti basqarýǵa berý baǵytynda júıeli jumystar júrgizilip otyr.
Kásibı maman daıarlaýda – dýaldy oqytýdy engizýdiń mańyzy zor. О́tken oqý jylynda Jambyl oblysyndaǵy 27 kolledjde dýaldy oqytý engizilipti. Bul kórsetkish aldyńǵy oqý jylyna qaraǵanda artqanymen, áli de osy júıemen jumys júrgizetin kolledjder sanyn ulǵaıtý qajet. О́ıtkeni, bul júıe – bilimgerlerdiń mamandyqqa mashyqtanýyna, teorııalyq bilimin tájirıbemen ushtastyrýǵa jáne jumysqa ornalasýǵa úlken múmkindik beredi.
Bıyl Jambyl oblysynda jalpy quny 16,8 mlrd teńgeni quraıtyn 8 ınvestısııalyq jobany iske asyrý josparlanýda, 380 jańa jumys ornyn ashý kózdelýde. Bul degenimiz kolledjde oqyp júrgen jastarymyz úshin úlken múmkindik emes pe? Endeshe tehnıkalyq-kásiptik bilim berý uıymdary óńirde ınvestısııalyq jobalar boıynsha ashylatyn kásiporyndarmen tyǵyz baılanys jasap, olardyń qajettilikterine sáıkes kadrlar daıyndaýlary tıis.
Sondyqtan oblystyq bilim basqarmasy, jumyspen qamtýdy úılestirý jáne áleýmettik baǵdarlamalar, aýylsharýashylyǵy, kásipkerlik basqarmalary oblystyq kásipkerler palatasymen birlese otyryp, kásiptik baǵdar berý jumystaryn uıymdastyryp, dýaldy oqytý engizilgen kolledjder jelisin ulǵaıtyp, bitirýshilerdiń jumysqa ornalasýyna barynsha yqpal etý sharalaryn júrgizýleri qajet. Bul úshin, árıne, aı saıyn jumysqa ornalasqan túlekter týraly málimetter bazasyn jańartyp, qadaǵalap otyrý kerek.
Qalaı aıtsaq ta kolledj túlekterin jumysqa ornalastyrý – kúrdeli másele. Tek bul másele joǵary jaqqa aqpar berý úshin qaǵaz betinde ǵana emes, is júzinde oryndalyp jatsa jastardyń kásiptik bilim beretin orta oqý oryndaryna degen yqylasy arta túsetini anyq.
Oralhan DÁÝIT,
«Egemen Qazaqstan»
Jambyl oblysy