Elimizde medısına salasyna basymdyq berilip, bilikti kadrlardy daıyndaý isi jyl saıyn qarqyndy damyp keledi. Osy maqsatta «Medbıkelik is» mamandyǵy boıynsha qoldanbaly bakalavrıattyń bilim berý baǵdarlamasy daıyndaldy. Bul týraly Qazaqstan ulttyq telearnasy habarlady.
Iаǵnı, buǵan deıin tájirıbesi bar bilikti medbıkeler osy kolledjerde bilim alyp, dárigerdiń dárejesine bir qadam jaqyndaıdy. Bul aq halatty abzal jandardyń jumysyn jeńildetip qana qoımaı, medısınalyq kómek sapasynyń artýyna múmkindik beredi. Respýblıkadaǵy 6 medısınalyq kolledjge osy baǵdarlamany engizý arqyly «joǵary» degen mártebe berildi. Sonyń biri – Kókshetaýdaǵy medısınalyq kolledj. Munda osy mamandyq boıynsha 50 úmitker tapsyryp, 25-i memlekettik grant jeńip aldy. Endi olar bir jarym jyl bilim alyp, bakalavr dárejesine ıe bolady.
Jalpy bul úrdis shetelde burynnan qalyptasqan eken. Elimizde bul jobany fınlıandııalyq sarapshylar men otandyq mamandar birlese ázirlegen. Aıta keteıik, elimizde 26 memlekettik, 37 jekemenshik kolledj bar. Jyl saıyn orta eseppen 12000 medısına qyzmetkeri daıyndalady.
Aıman MUQYShEVA