«Qazaqstan sheteldik BAQ kózimen» baıqaýyn uıymdastyrý komıtetine kelip túsken materıaldardyń sapasy kóńilimizden shyqty. Jyl ótken saıyn konkýrsqa qatysýǵa nıet jáne qyzyǵýshylyq tanytýshylardyń qatary ósip keledi. Iаǵnı, bul – ósý dınamıkasy bar degen sóz. Osyndaı baıqaýlar arqyly álem jurtshylyǵy qazaq halqy, onyń bolmysy, ulttyq qundylyqtary men erekshelikteri, Qazaqstannyń ustanyp otyrǵan saıasaty týraly tereńirek bilýge múmkindik alady».
Keshe Syrtqy ister mınıstrligi men Qazaqstan Bas redaktorlar klýby uıymdastyrǵan «Qazaqstan sheteldik BAQ kózimen» baıqaýynyń jeńimpazdaryn marapattaý rásimi kezinde elimizdiń Syrtqy ister mınıstri Erlan Ydyrysov osylaı dedi.
Osymen úshinshi márte uıymdastyrylyp otyrǵan baıqaýǵa dúnıe júziniń 30-ǵa jýyq elinen 60-qa tarta ótinim kelip túsipti. Bul joly Iordanııa, Reseı, AQSh, Túrkııa jáne Fransııa elderi jýrnalısteriniń baǵy janyp, baıqaý jeńimpazdary dep tanyldy. Máselen, qazylar alqasy TMD elderiniń arasynan Reseı jýrnalısi Marına Nabatnıkovanyń jazǵan maqalasyn úzdik dep baǵalapty.
«Argýmenty ı fakty» aptalyq gazetiniń tilshisi «Damý úshin jaralǵan. Qazaqstanmen saýda-ekonomıkalyq qarym-qatynas qalaı damyp keledi?» taqyryby boıynsha jaryq kórgen maqalasynda ol Qazaqstan men Reseı arasyndaǵy saýda-ekonomıkalyq jáne mádenı yqpaldastyq máselelerin jan-jaqty taldaýǵa tyrysqan eken. Sondaı-aq, Fransııadaǵy «HuffingtonPost.fr» onlaın-basylymynda shyqqan «EKSPO-2017: bolashaq energııa qandaı bolady?» maqalasy úshin Paýlın Gavrılov, al AQSh-tyń «Washington Times» gazetinde Qazaqstannyń «Bolashaq» baǵdarlamasy týraly jarııalanǵan materıaly úshin Dýglas Barton jeńimpazdar qataryn tolyqtyrdy.
Bul joly Taıaý Shyǵys jáne Afrıka elderi úmitkerleriniń arasynan ıordanııalyq jýrnalıst Mohammed Gazaldyń «The Jordan Times» basylymynda shyqqan «Iordanııa men Qazaqstannyń álemge degen kózqarasy ortaq» taqyrybyndaǵy maqalasy men Azııa elderi jýrnalısteriniń arasynan Túrkııanyń belgili jýrnalısi Kýrshad Zorlýdyń «Yeni Cag» gazetinde jaryq kórgen «Eýrazııanyń kilti – Qazaqstannyń damýy men turaqtylyǵynda» atty jazbasy qazylardyń joǵary baǵasyn aldy.
Marapattaý rásiminiń sońynda Syrtqy ister mınıstri Erlan Ydyrysov atalǵan sharany uıymdastyrýǵa demeýshilik tanytyp, qoldaý kórsetkenderi úshin «Qazaqstan Temir Joly UK» aksıonerlik qoǵamyna, Qazaqstannyń Ulttyq Olımpıadalyq komıtetine, «Rixos President» jáne «Rixos Borovoe» qonaqúılerine, «Arǵymaq» kólik kompanııasyna, sonymen qatar, baıqaýdyń halyqaralyq seriktesi sanalatyn «KLM Gollandııa Koroldigi áýejelileri» iri áýe tasymaldaýshysyna alǵysyn bildirdi.
Láıla EDILQYZY,
«Egemen Qazaqstan»