«QazAqparat» ta jańarady

Ortalyq kommýnıkasııalar qyzmetinde ótken baspasóz máslıhaty kezinde «QazAqparat» agenttigin damytýdyń jańa strategııasynyń tanystyrylymy  ótti. Oǵan agenttiktiń bas dırektory Ásel Tólegenova men bas dırektordyń orynbasary Qalamqas Ábýova qatysty.  «QazAqparat» agenttiginiń aldynda turǵan negizgi mindet – elimizdiń eń basty aqparat saıty dárejesine saı bolý. Bizdiń bolashaqtaǵy jumysymyz birneshe kórsetkishke negizdeledi. Eń negizgi kórsetkish satysynda agent­tik taratatyn materıaldardyń oqy­lymdylyǵy tur»,– dedi óziniń sózinde Ásel Dýlatqyzy. Onyń aıtýynsha, «QazAqparat» saıtyna táýligine or­ta eseppen 27 myń adam kirip, ondaǵy aqparattarmen tanysady eken. «Biz bolashaqta bul kórsetkishti 45 myńǵa deıin jetkizýdi kózdep otyrmyz. Ol úshin eń aldymen, bizdiń kontentimiz túbirimen jáne tolyqtaı jańarady. Árıne, burynǵydaı mem­lekettik baǵdarlamalar men memle­­kettik organdardyń qyzmeti týra­ly aqparattar turaqty túrde jarııalanyp turady. Biraq odan bólek, biz qarapaıym ınternet paıdalanýshy oqyrmannyń talap-tilegine jaýap beretin, olardy qyzyqtyratyn, oı údelerinen shyǵatyn dúnıelerdi barynsha kóp jarııalaýdy nazarda ustap otyramyz», – dedi Ásel Dýlatqyzy. Agenttik bas dırektorynyń aıtýynsha, aldaǵy ýaqytta agenttik saıtynda jarııalanatyn aqparattardy berýdiń qalyby ózgermek. «Bul rette, habarlardyń taqyryptary oqyr­mandardy tartatyndaı oınaqy, al mazmuny jeńil qabyldanatyndaı stılde jazylady. Buǵan qosa, biz­diń logotıpimiz de ózgeredi. Iаǵnı, halyq­aralyq aqparat agenttigi aty­na saı bolý úshin logotıpke «álem» uǵymyn beretin globýs sekildi jańa elementti engizdik. Sonymen qatar, aldaǵy ýaqytta saıt qoldanýshylarymen keri baılanys ornatyp, olardy tolǵandyratyn máselelerge de turaqty túrde ún qo­syp otyrmaqpyz», – dedi agenttiktiń bas dırektory. Baspasóz máslıhatynda sóz alǵan «QazAqparat» bas dırektorynyń oryn­basary Qalamqas Ábýova da agenttik jumysyn jaqsartý, onyń saıtyn jańartý baǵytynda ujym aldynda aýqymdy mindetter qoıylyp otyrǵanyn jetkizdi. «Bulardyń barlyǵy bizdiń ujymnyń qolynan keletin sharýa dep oılaımyz. Máselen, jaqynda Rıoda ótken Olımpıada oıyndaryna agenttigimizden arnaıy tilshi bardy. Ol Olımpıadanyń alǵashqy kúninen sońǵy kúnine deıin tek qana qazaq tilinde 396 materıaldy fotolarymen joldady. Ol aqpa­rattardyń barlyǵy sol kezde óte kóp suranysqa ıe boldy», –dedi Qalamqas Áskerqyzy. «QazAqparat» ókilderi, sondaı-aq, búginde saıttyń tehnıkalyq turǵyda jańalanýy men ózgerýine, dızaınnyń jańarýyna aıryqsha mán beriletinin, bulardyń barlyǵy agenttik saıtynyń árdaıym trendte bolý qajettiginen týyndap otyrǵanyn atap ótti. «Biz­diń saıtymyzda basy artyq, oqyrmandardy jalyqtyratyn materıaldar bolmaıdy. Foto jáne beıneblogtar da saıt qoldanýshylardyń nazaryn aýdartatyndaı deńgeıde irikteledi. Bulardan bólek, onlaın-kórsetilimder, ınfografıka, valıýta kýrsy, aýa raıy da turaqty túrde berilip turady. Iаǵnı, saıt jeńil, yńǵaıly bolýy úshin búginde barlyq alǵyshart jasalýda», – dedi agenttiktiń bas dırektory. Láıla EDILQYZY, «Egemen Qazaqstan»