Álemdik ekonomıkada sońǵy on jyldyń bederinde qordalanǵan problema jetip artylady. Bul árisi AQSh-tan, Eýropadan bastaý alady. Sol problemalar kúni búginge deıin jalǵasyp keledi. «Jyǵylǵan ústine judyryq» degendeıin, ekonomıkalyq daǵdarystyń ústine endi kelip shıkizat baǵasynyń tómendeýi, sondaı-aq, álemdik kúrdeli ahýal, Sırııa, Lıvııadaǵy soǵystar, kóshi-qon, terrorızm máseleleri qosyldy. Osynyń barlyǵy jınaqtalyp, jalpy, jahandyq ekonomıkaǵa óziniń zardabyn tıgizip otyr. Osyny bizdiń de sezinip otyrǵan jaıymyz bar. О́ıtkeni, Qazaqstannyń jahandyq ekonomıkadan oqshaýlanyp ómir súre almaıtyny taǵy belgili.
Jekelegen memleketter qordalanǵan problemalardy BRIKS, ASEAN, EýrAzEQ sııaqty transqurlyqtyq júıe qurý arqyly sheshýge umtylǵanymen, biraq olar tutastaı alǵanda jahandyq problemalardyń túıinin tarqata almaıdy.
Qazirgi kezde álemdik ekonomıkanyń damýy qanshalyqty jedel bolsa, jaǵdaıdyń da kúrdeli ekendigi sonshalyq, bizdiń Prezıdent osyǵan oraı Qytaıdy ótken sammıtte sóılegen sózinde birtutas jahandyq uıym qurýdy usyndy. О́z kezeginde atalǵan uıym barlyǵyn biriktirip, álemniń qarjy saıasatyn úılestirip otyratyn bolady.
Elbasy «Úlken jıyrmalyq» sammıtinde problemalardy sheshýdiń naqty joldaryn usyndy. Eń bastysy – jıyrma memleketpen ǵana shektelmeý, kúshti damyp kele jatqan memleketterdi qosý, Qazaqstan da sońǵylardyń qatarynda. G20 alańyn kúsheıtý jóninde de usynys bar. Sońǵy Astana ekonomıkalyq forýmynda tıimdi usynystardy biriktirý jóninde sheshim qabyldanǵandyǵyn bilemiz. Qazaqstanda qurylǵan G-global alańyn, sarapshylar men ınstıtýttar óz usynystaryn bere alatyn zamanaýı alań dep aıtýǵa bolady. Atalǵan problemalar búkil álemge jáne árbir memleketke, onyń ishinde Qazaqstanǵa da qatysty. Álemdik problemalar sheshilgen jaǵdaıda, bizdiń problemalarymyzdyń da túıini tarqatylady.
Baqtybaı ShELPEKOV,
Parlament Senatynyń depýtaty