Búginderi oblys dıqandarynyń barlyq kúsh-jigeri men jınaqtalǵan is-tájirıbesi mańdaı termen ósirilgen el rızyǵyn shashpaı-tókpeı jınap alýǵa jumyldyrylǵan. Ýaqytpen sanaspaı eńbek etýge daǵdylanǵan aýyldyqtardyń basty maqsaty – azyq-túlik qaýipsizdigin qamtamasyz etýge óz úlesterin qosý. Qaı aýdanǵa barsań da, kúzgi jıyn-terin naýqanyna saqadaı-saı daıyndyqpen kelgenderi birden baıqalady. Aımaq basshysy Erik Sultanov birqatar aýdandy aralap, kúzgi oraq naýqanynyń barysymen tanysty. Astyq sapasyna joǵary baǵa berip, qarqyndy báseńdetpeı jaýapty naýqandy ýaqtyly aıaqtaýdy tapsyrdy. Agroqurylym jetekshileri bıdaıdyń baǵasyn kóterý jóninde Úkimetke usynys jiberilgenin estip, kóńilderi kóterilip qaldy.
Mine, «AzkoJańajol» seriktestiginiń egis alqaby. Kereqarys masaqtar jerge ıilip, sap-sary badanadaı dánder agrotehnıkalyq kútim sharalarynyń talapqa saı atqarylǵanyn ańǵartady. Sharýashylyq 9,5 myń gektar alqapqa maıly daqyl túrlerin de ornalastyrǵan. Mehanızatorlardyń qımyly shıraq. Astyq bastyrýǵa 10 kombaın tartylǵan. 15 júrgizýshi tasymal isimen aınalysady. Arpa men sulyny jınaýdy aıaqtap, negizgi daqyl bıdaıdy orý men bastyrýǵa jappaı kirisken. Shalaqyndyqtar 186,5 myń gektar alqapqa egilgen dándi daqyldardyń jartysyna jýyǵyn qyrmandarǵa jóneltken. Gektar shyǵymdylyǵy 14,4 sentnerden asyp jyǵylady. «Aýa raıy qolaıly bolsa, jýyq arada aıaqtap qalamyz. Astyq qabyldaý kásiporyndary men elevatorlarda kidiris joq. Janar-jaǵarmaı jetkilikti», – deıdi aýdandyq aýyl sharýashylyǵy bóliminiń basshysy Bolat Raıysov.
Sınoptıkterdiń boljaýynsha qyrkúıektiń sońyna taman aýa raıy qubylýy múmkin. Dıqandar qaýymynyń ár kúndi tıimdi paıdalanyp jatqandary sondyqtan. «TransAgroInvest» JShS-niń oblysta birinshi bolyp qyzylsha ósirýdiń jańa tehnologııasyn ıgerýi quptarlyq. Aýdan ortalyǵynda salynyp jatqan qant zaýyty paıdalanýǵa berilse, 84 adam turaqty jumyspen qamtylady. Táýliktik qýattylyǵy– 500 tonna. Shıkizat jergilikti jerden bolǵandyqtan, baǵa da qoljetimdi keletini túsinikti. Qyzylshanyń «Krıstella» suryby egilip, 70-75 tonna ónim alynýda.
Oblys ákimi jol-jónekeı Sergeevka qalasynda ornatylǵan ortalyq qazandyqtyń, Voloshınka – Sergeevka – Tımırıazev baǵyttary boıynsha avtomobıl jolyn jóndeý jumystarymen tanysty. Kóktemde joldyń bir bóligin qarǵyn sý shaıyp ketken bolatyn. Qazir ol qalpyna keltirilip, bógesinmen qorshalǵan. 12 myń tonna qıyrshyq tas tóselgen. Sosyn sý ótkizetin qubyrlar salynatyn bolady.
Esil aýdanyna qarasty «Atameken-Agro Korneevka» JShS-ne basshylyq jasaıtyn Nıkolaı Babaktyń kúzgi oraqqa tyńǵylyqty ázirlikpen kelgeni birden baıqalady. Arpa, burshaq, zyǵyr daqyldaryn jınaýdy bitirip, bıdaı bastyrýdy eńserip tastaǵan. О́nimdilik ázirge 20 sentnerdi qurap otyr. «Berekeli gektarlar alda», deıdi N. Babak júzindegi qýanyshyn jasyrmaı. Sol sııaqty «Prometeı-Agro», «Fregat V.V.», «Kantemır-Agro» sharýashylyqtarynda da egin jınaý bel ortadan aýǵan. Mamlıýt aýdany «Mámbetov jáne K» komandıttik seriktestigi 14 myń gektar alqaptyń 60 paıyzdaıyn bastyryp alǵan. Munda mal azyǵyn daıyndaý da joǵary qarqynmen júrgizilýde. Jambyl aýdanynda ornalasqan «Ideıa Grýpp Sever» seriktestiginiń dıqandary zyǵyrdyń gektar túsimdiligin 20, bıdaıdy 23 sentnerden aınaldyrýda. Jarys kóshin Tımırıazev aýdanynyń dıqandary bastap keledi. Munda gektar berekeli 20 sentner bolsa, «Atameken Agro Tımırıazevo» JShS-de 5 sentnerge joǵary. Jaýapty naýqanǵa barlyǵy 270 kombaın jumyldyrylǵan. Agrarshylar 32 myń gektar alqapqa desıkasııa ádisin qoldanyp, bıdaıdyń pisýin jedeldetken.
Oblystyq aýyl sharýashylyǵy basqarmasynyń jedel málimetterine qaraǵanda, 2 mıllıon gektar alqaptyń dándi daqyldary destelenip, gektar shyǵymdylyǵy 15,5 sentnerdi qurap otyr.
О́mir ESQALI,
«Egemen Qazaqstan»
Soltústik Qazaqstan oblysy
Sýretterdi túsirgen
Vıtalıı VLASENKO