Jaqynda 100 serııaly "Aıman-Sholpan" teleserıaly bastalady

"12 qyrkúıekte ózimiz óndirgen 100 bólimdi "Aıman-Sholpan" teleserııalynyń premerasy bolady" dedi "Qazaqstan" RTRK» AQ-tyń Basqarma tóraıymy Nurjan Muhamedjanova. Bul týraly ol  Aqparat jáne kommýnıkasııalar mınıstri Dáýren Abaevtyń qatysýymen  keńeıtilgen alqa májilisinde málim etti. Muhamedjanovanyń aıtýynsha, serıaldyń sıýjeti otbasy ınstıtýtyn nyǵaıtýǵa baǵyttalǵan. "Bizdiń jańa telejobalarymyzdyń barlyǵy kórermenderdiń júregine jol taýyp, keıipkerlerimiz kózaıymǵa aınalatynyna senimdimiz. Sonymen qatar, el tynyshtyǵyn kúzetip júrgen saqshylar týraly 16 bólimdi «Shekara sheginde» telehıkaıasy efırge shyǵady", - dedi N.Muhamedjanova. Al "Balapan" telearnasynyń kishkentaı kórermenderi «Álı men Aııa», «Sálem, Qazaqstan!», «Danyshpan qarǵa» anımasııalyq fılmderiniń jalǵasyn kóre alady. «Oılan, tap!», «Myń túrli suraq», «Birge – bir» jobalary da jańa shyǵarylymdarymen kórermenderdi qýantpaq. Táýelsizdigimizdiń 25 jyldyǵyna oraı «Jyl tańdaýy», «Balapan juldyz» mega-jobalary efırge shyǵady» dedi Basqarma tóraıymy. Onyń sózine qaraǵanda, "Qazaqstan" ulttyq telearnasy jasaǵan telehıkaıalar shetelde joǵary suranysqa ıe. «Kórermender yqylasyna bólengen «Syrǵalym», «Qasym», «Jambyl» kórkem telehıkaıalary búginde Reseı, Tatarstan, AQSh, Kıpr men Slovenııa elderinde kórsetilýde".