Qorǵanys mınıstri Imanǵalı Tasmaǵambetov «Spassk» oqý-jattyǵý ortalyǵy men 68665 áskerı bólimin damytý jóninde kóshpeli keńes ótkizdi.
Qorǵanys vedomstvosynyń basshysy «Spassk» oqý-jattyǵý ortalyǵynyń barlyq obektilerin tekserip, Qaraǵandy garnızonyndaǵy 32356 áskerı bólimdi damytý jónindegi negizgi basymdyqtar men jumystyń barlyq kólemin belgiledi. Tank aılaǵy, taktıkalyq alań, áskerı jaraqtandyrý pýnktteri, baqylaý-ótkizý pýnkti, kazarmalar ǵana emes, sonymen birge, áskerı qyzmetshilerdiń turmysyna qajetti monsha, klýb ǵımaraty, jataqhana, jylytý qubyrlary men azyq-túlik qoımasy sekildi nysandar aýqymdy jóndeýden ótedi.
Búgingi tańda «Spassk» Qazaqstan Qarýly Kúshteri oqý-jattyǵý ortalyqtarynyń biri bolyp tabylady. Onda «Aıbyn» áskerı-patrıottyq jastar jıyny jáne «Altyn úki» halyqaralyq saıysy sııaqty respýblıkalyq jáne halyqaralyq deńgeıdegi iri aýqymdy is-sharalar ótkiziledi.
«Tártip bolǵan jaǵdaıda ǵana biz atqaryp jatqan jumysta ilgerileý bolady, – dep atap ótti I.Tasmaǵambetov. – Bul áskerı júıedegi shetki buryshty tas ispetti. Barlyǵy merziminde oryndalatyn sapaly jumysqa baılanysty. Sebebi, onsyz aýqymdy jobalardy iske asyrý múmkin emes».
Qorǵanys mınıstri Astana mańyńdaǵy 68665 áskerı bóliminiń ınfraqurylymy da aldaǵy ýaqytta jańartylatynyn belgiledi. Munda barlyq aýmaq jáne ákimshilik-kazarmalyq aımaq nysandary abattandyrylady. Qazirgi ýaqytta 120 páterli eki turǵyn úıdiń qurylysy júrip jatyr.
Odan basqa, bólim aýmaǵynda palatkaly lagerge arnalǵan aımaq qarastyrylady. Onda dalalyq jattyǵýlar men praktıkalyq sabaqtar kezinde áskerı qyzmetshilerdi ornalastyrý josparlanýda. Bir sózben aıtqanda, lager qazirgi zamanǵy talaptarǵa saı bolady. Alaıda, jaǵdaı jaýyngerlikke barynsha jaqyndatylady.
«Egemen-aqparat»