Oblys ákimi B.Atamqulov Sozaq aýdanynda bolǵan kezinde qarakól qoıyn ósirýge basa kóńil bólý kerek degen bolatyn. Búgingi tańda mal sharýashylyǵymen aınalysatyn sharýa qojalyqtarynyń bári etti qoı túrlerin ósirýmen aınalysyp ketken. Al sala mamandary kózin tapsa, qarakól sharýashylyǵynan keler tabystyń kól-kósir bolatynyn aıtady.
Osy baǵyttaǵy jumysty jandandyrǵan teriskeılikterdiń qarakól mal sharýashylyǵyn damytý jónindegi jumysy óz nátıjesin bere bastady. Búginde Sozaq aýdanynda eki birdeı sharýashylyq – «Qumkent» jáne «Qara qur» óndiristik kooperatıvi qarakól qoıyn ósirýmen aınalysady. Tamyz aıynda «Qara qur» óndiristik kooperatıvi óz ónimderin Birikken Arab Ámirlikterine eksportqa shyǵaryp, tıimdi baǵada satty. «Arab Ámirlikterinen mamandar kelip, 1238 bas erkek qarakól toqty aldy. Jyl sońyna deıin taǵy eksportqa shyǵarýdy josparlap otyrmyz. Árıne sheteldikterdiń qoı alýda óz talaptary bar, biz sol údeden shyqtyq», – deıdi «Qara qur» óndiristik kooperatıviniń basshysy J.Sadyrhanuly.
Aýdan ákimi M.Isaev jýyrda ǵana kásipkerlermen kezdesý barysynda mal etin óndirýshi agroqurylym basshylaryna shetelge mal etin eksportqa shyǵarýǵa zor múmkindik týyp turǵanyn aıtyp, osy baǵyttaǵy jumysty jandandyrýǵa shaqyrǵan bolatyn.
Erlan RAIYMQULOV
Ońtústik Qazaqstan oblysy,
Sozaq aýdany