Rıo Olımpıadasynda 63 kıloǵa deıingi salmaqta qola medal alǵan aýyr atlet Karına Gorıchevaǵa ózi oqyǵan Qazaq memlekettik qyzdar pedagogıkalyq ýnıversıtetiniń ujymy qurmet kórsetti. Olımpıada júldegerin El mereıin tasytqan túlekti ýnıversıtet rektory Dınar Nóketaeva bastaǵan oqytýshylar men stýdentter toby qushaq jaıa qarsy aldy.
Karına aýyr atletıkamen 15 jasynan beri aınalysyp keledi. Myqty sportshy jastar arasyndaǵy álem chempıonattarynyń kúmis jáne qola, Qazanda ótken Búkilálemdik ýnıversıadanyń kúmis, jasóspirimder arasyndaǵy Azııa chempıonatynyń qola medaldaryn alǵan.
Qyzdar ýnıversıteti sporttyń qaı túrinde bolmasyn belsendi. Ýnıversıtet komandasy «Áıelder densaýlyǵy» qalalyq olımpıadasynyń eki dúrkin chempıony. Stýdenttik jataqhanalarda fıtnes-zaldar jumys isteıdi. О́tken jyly úlken «Aqqý» júzý basseıni paıdalanýǵa berildi.
Sonymen, sońy konsertke ulasqan kezdesýde Olımpıada júldegeri stýdentterge óz qoltańbasyn berip, estelik sýretke tústi.
Arýlar ordasynyń jazǵy alańynda sán-saltanatpen ótken oqıǵada sportshy qyzǵa tegin oqytý sertıfıkaty – rektor granty tapsyryldy. K.Gorıcheva endi psıhologııa mamandyǵy boıynsha da bilim alatyn bolady.
Aınash ESALI,
«Egemen Qazaqstan»
ALMATY