Áıelinen qutylý úshin túrmege túskisi kelgen
AQSh-tyń Kanzas shtatynda turatyn 70 jastaǵy kisi qarý asynyp, bankke kelgende, eshkimniń ómirine qaýip tóndirmegen, suraǵan aqshany alǵan soń qashyp ketpegen.
Banktiń operasııalyq zalynda Loýrens Djon Rıppl kassırden seıftegi barlyq aqshasyn alyp berýdi talap etedi. Biraq birden kete qoımaıdy. Bankke polıseıler kelgende, tonaýshy óziniń bul áreketin aqsha úshin emes, áıelinen qutylý úshin jasaǵanyn aıtqan. Zaıybynan ábden jalyqqany sondaı, odan qashyp, demalý úshin túrmege túskendi jón kórgen.
Qurban aıtqa ataǵan malyn úıdiń tóbesinde baqqan
Pákistannyń Karachı qalasy turǵynynyń Qurban aıtqa semirtip, bazarǵa shyǵaryp, satýǵa daıyndap otyrǵan sıyryn úıdiń tóbesinen jerge túsirý úshin kran kerek bolyp qaldy.
Aıta ketý kerek, qazir halqynyń sany 20 mıllıon adamnan asyp ketetin qala turǵyndarynyń kóbi arnaıy oryndardyń joqtyǵy men jerdiń bólinbeýi saldarynan Qurban aıtta soıatyn maldaryn ózderi turatyn úılerdiń shatyrlarynda ustaýǵa májbúr bolyp otyr.
Bir ıt tórt toraıdy baýyryna basty
Kýbanyń Plaııa-Larga qalasynda turatyn Larga Ignasıo Estevestiń ıti anasy ólip qalǵan toraılardy baýyryna basyp, shyn máninde asyrap aldy.
Túlik ıesi tórt toraı týǵan shoshqasy kenetten ólip qalǵanda, ne isterin bilmeı sasqanyn aıtady. Bir ǵajaby, fermer kisi toraılardy qoınyna salyp bergende, Lında atty ıti olardan bas tartpaı, kútimge alady. Oǵan endi óziniń alty kúshigimen birge kishkentaı tórt toraıdy da emizýge týra keledi. Estevestiń aıtýynsha, Lında basynda toraılardan eptep qysylyp júrgen, biraq keıin kele jetim qalǵan olardy da óz balalaryndaı kórip ketedi.
Bireýmen attas bolýdyń da azary bar
Ońtústik Koreıada turatyn Kım Chen Yn atty áıel KHDR lıderimen tolyq attas bolýy sebepti Amerıkanyń sanksııasy sheńberine jıi túsip qalypty.
Koreı áıel bıylǵy tamyz aıynda Ońtústik Afrıka memleketinde turatyn sińlisine 27 myń dollar kóleminde aqsha salady. Alaıda, qarjy óziniń mánziline jetpeıdi. Al tekserý barysynda aqsha jóneltýdiń AQSh-taǵy korrespondenttik esepshottardyń biri arqyly júrgizilgeni anyqtalady. Sóıtse, ondaǵylar Soltústik Koreıa basshysynyń aty-jónin kórgennen keıin birden operasııany toqtatyp tastapty. Bank qyzmetkerleri aqshanyń Koreıa Respýblıkasynan jiberilgenine de mán bere qoımaıdy.
Iesin 6 kún boıy aýrýhana janynda kútken
Ispanııada Hatıko atty ıtti eske túsiretin oqıǵa oryn aldy. Aıta-ıný tuqymdas Maııa esimdi tóbet óziniń 22 jasar ıesi Sandra Inesta aýyryp jatyp qalǵanda ony aýrýhana janynda 6 kún tapjylmaı kútken.
Boıjetken kóligine ıtin salyp alyp, Barselona kóshelerinde júrip kele jatqanynda ishi qatty búrip aýyrady. Sosyn qyzǵa aýrýhana janyna toqtap, shuǵyl dárigerlerge kórinýge týra kelgen. Al esiktiń aldynda qalǵan ıtti qyzdyń ákesi de alyp kete almapty. Sondyqtan adal ıtti aýrýhananyń medısınalyq personaly sol ýaqyttyń bárinde tamaqtandyryp turypty.
Salqyn syraǵa qanǵyń kelse, Slovenııaǵa bar
Slovenııanyń Jales qalasynda Eýropa qurlyǵyndaǵy birinshi syra sýburqaǵy ashyldy.
Qyrkúıektiń 6-sy kúni aýa raıynyń qolaısyz bolyp turǵanyna qaramastan, syra atqylaıtyn fontannyń ashylý saltanatyna bes myńnan astam adam kelgen. Olar bul jerden alty eýro tólep, syranyń dámin tatyp kórgen. Osy somadaǵy aqshaǵa ár adam bes saptyaıaq kóbikti sýsyndy ishe alatyn bolǵan. Endi qala basshylyǵy osy syra burqaǵynyń arqasynda týrısterdi kóptep tartýdy armandap otyr.
Aqparat agenttikteriniń materıaldary negizinde daıyndaldy