Jalpy, qorqytyp-úrkitý degen adam balasyna tán qasıet qoı. Qoqan-loqy kórsetýińiz de solaı. Alaıda, qolǵa qarý alyp, tutas memleketti dúrliktirý degenińiz úlken qylmys emes pe?! Sońǵy kezde halyqty qalqan retinde alǵa salyp, óz maqsatyn júzege asyrýǵa umtylý, jankeshtilerdi jumsaý arqyly memleketti terrorlyq áreketimen tusaýlaǵysy keletinder shoǵyry paıda boldy. Jekelegen memleketterdi ǵana emes, búkil álemdi ábigerge salatyn terrorıstik toptardy ázirge aýyzdyqtaý múmkin bolmaı tur. Jaqynda ǵana Úkimetten Parlament Májilisiniń qorjynyna kelip túsken «Qazaqstan Respýblıkasynyń keıbir zańnamalyq aktilerine ekstremızmge jáne terrorızmge qarsy is-qımyl máseleleri boıynsha ózgerister men tolyqtyrýlar engizý týraly» zań jobasy da Qazaqstan halqynyń qaýipsizdigin nyǵaıtýdan týyndap otyr.
Halyqtyń qaýipsizdigi demekshi, Memleket basshysy Nursultan Nazarbaev altynshy shaqyrylymdaǵy Parlamenttiń ekinshi sessııasynyń ashylýynda sóılegen sózinde de depýtattardyń aldynda turǵan ózekti problemanyń ishinde eń aldymen osy máselege toqtaldy.
«Birinshi. El qaýipsizdiginiń zańnamalyq negizin nyǵaıtý. Álemniń ózge elderi sııaqty Qazaqstan da tikeleı terrorlyq qaýip-qaterge kez boldy. Aqtóbe men Almatydaǵy terrorlyq aktilerdiń saldarynan Ulttyq ulan sarbazdary, polısııa qyzmetkerleri jáne eshbir jazyǵy joq azamattar qazaǵa ushyrady. Osyndaı jaǵdaıda memleket ulttyq qaýipsizdikti nyǵaıtýy tıis. Meniń tapsyrmam boıynsha ekstremızm men terrorızmge qarsy kúres, qarsy barlaý qyzmeti, daktıloskopııalyq jáne genomdyq tirkeý, probasııa, aqparattyq qaýipsizdik máseleleri boıynsha 7 zań jobasy jasalyp, Májilis qaraýyna engiziledi», degen edi Elbasy.
Osylaısha ótken beısenbi kúni Májiliste Prezıdenttiń tapsyrmasy boıynsha ázirlengen zań jobasynyń tanystyrylymy ótti. Árıne, zań jobasy Parlament qabyrǵasynda talqylaý barysynda jan-jaqty saraptalyp, jurtshylyqtyń pikiri de eskerilip, sapalyq jaǵynan shıraı túsetini sózsiz.
Eldegi zańdardyń qataıtylýy ulttyq qaýipsizdikti nyǵaıtýmen astasyp jatyr. Áıtpese, tórińde terrorıster oıran salatyn bolsa, memlekettiń myzǵymastyǵy jóninde, táýelsizdiktiń tuǵyrlylyǵy týraly qalaı áńgime qozǵaýǵa bolady?
Aıtpaqshy terrorısterdiń qanquıly áreketiniń saldarynan Nıý-Iorktegi Búkilálemdik saýda ortalyǵy ǵımaratynyń, halyq aýzynda «Egiz munara» atanyp ketken ǵımarattyń jermen jeksen bolǵanyna da tup-týra 15 jyldyń júzi bolypty. Alaıda, sodan beri de kúlli dúnıe jurtshylyǵy qaýymdasyp, lańkestikti tusaýlaı almaı keledi. Osy ýaqyttyń bederinde terrorızm ataýly muhıttyń arǵy betinen Azııa qurlyǵyna aýysyp, áli kúnge deıin Sırııa lańkestik «syrqatynan» saýyǵa almaı otyr. Kári qurlyqtyń qaq ortasynda, Parıj ben Brıýsselde de osy terrorızmniń kesirinen talaı beıbit turǵyn qurban boldy. Qysqasy, terrorızm tórtkúl dúnıeni teńseltip tur. Sol sebepti, zulymdyq ataýlyny álem bolyp kúrespeı, aýyzdyqtaý qıyn.
«Búginde terrorızmniń jahandyq máselege aınalǵany eshkimniń kúmánin týǵyzbaıdy jáne onymen búkil álem bolyp kúresken jón. Qazaqstan terrorızm men ekstremızmniń kez kelgen kórinisin tabandy túrde aıyptaıdy jáne búkil elderdiń bul zulym kúshke qarsy ǵalamdyq jumysyna atsalysady», degen bolatyn Nursultan Nazarbaev ótken jyly Astanada shetel dıplomatııalyq korpýs ókilderimen kezdesýinde.
Terrorızmge qarsy, jalpy álemdik qaýipsizdik turǵysyndaǵy Qazaq eliniń ustanymy osyndaı. Olaı bolsa, terrorızm men ekstremızmge qarsy zańnamalyq negizdi meılinshe qataıtqan abzal. Zańnamany qataıtýmen qatar, terrorızmge qarsy ıdeologııalyq kúresti de pármendi túrde júrgizip, halyqtyń ıdeologııalyq ımmýnıtetin kúsheıte túsý qajet. Áıtpese, búldirgi aǵym arqyly sanasy ýlanǵandar halyqtyń ótken tarıhyn, dástúrin mansuqtaǵany óz aldyna, terrorıstik áreket arqyly memlekettilikke, ulttyq qaýipsizdikke qater tóndiretinin kózimiz kórip otyr.
Ǵabıt
ISKENDIRULY,
«Egemen Qazaqstan»