Is-sharany ashqan G.Ábdiqalyqova baıqaý jeńimpazdaryn marapattaý rásimine qatysýshylarǵa arnaǵan Qazaqstan Respýblıkasy Prezıdentiniń quttyqtaý sózin oqyp berdi, dep habarlady akorda.kz.
«Árbir otbasy bizdiń basty maqsatymyz – Bolashaǵy birtutas Máńgilik el bolý jolynda memleketimizdi nyǵaıta túsýge baǵa jetpes úles qosady. Otbasylyq qundylyqtary bekem ornyqqan el ǵana myzǵymas memleket bola alady. Búgingi mereıli kúnde shańyraǵynda izgi qarym-qatynas, ıgi dástúrler saqtalyp, ózara syılastyq saltanat qurǵan barlyq otbasyǵa rızashylyǵymdy bildiremin», – delingen quttyqtaýda.
Saltanatty is-shara aıasynda Memlekettik hatshy márege jetken ár otbasyǵa gramota men dıplom jáne turmystyq tehnıka satyp alýǵa arnalǵan 300 myń teńgelik sertıfıkat tapsyrdy.
Qyrkúıektiń 2-si men 9-y aralyǵynda ınternet arqyly sms daýys berý arqyly ótkizilgen konkýrstyń fınaldyq týrynda jeńimpaz otbasy anyqtaldy. Aqtóbe oblysynan qatysqan Nusqabaevtar otbasy «Mereıli otbasy» ulttyq baıqaýynyń 2016 jylǵy laýreaty atandy. Otaǵasy – Uly Otan soǵysynyń ardageri, ol 46 jyl boıy aýyl mektebinde ustazdyq etken. Erli-zaıypty Nusqabaevtardyń shańyraq kótergenine 72 jyl tolyp, 10 bala, 30 nemere, 22 shóbere súıip otyr. Balalary men nemereleri el ekonomıkasynyń túrli salasynda tabysty eńbek etip júr.
G.Ábdiqalyqova jeńimpaz otbasyǵa estelik syılyq pen shaǵyn avtobýs kiltin saltanatty túrde tabys etti.
Marapattaý rásimi Qazaqstannyń estrada ártisteriniń qatysýymen merekelik konsertke ulasty.