«Astana Opera» memlekettik opera jáne balet teatrynda III Halyqaralyq balet ártisteriniń baıqaýy bastaldy.
Halyqaralyq baıqaý Mádenıet mınıstrliginiń qoldaýymen buǵan deıin eki ret ótkizilgeni belgili. Onyń biri 2006 jyly, ekinshisi 2009 jyly uıymdastyrylǵan. Endi araǵa jeti jyl salyp, úshinshi halyqaralyq baıqaý shymyldyǵyn ashty. Onyń quryltaıshysy ári uıymdastyrýshysy – sońǵy jyldary elimizdiń horeografııa ónerin damytýǵa zor úles qosyp kele jatqan «Balet pen ulttyq bıdi damytý jáne qoldaý qory». Al bas seriktesi Qazaqstan Respýblıkasynyń Tuńǵysh Prezıdenti – Elbasynyń qory bolyp otyr.
Baıqaýdyń ashylýyna Mádenıet jáne sport mınıstri Arystanbek Muhamedıuly qatysty. Ol Memlekettik hatshy Gúlshara Ábdiqalyqovanyń Qazaqstan men Reseıden, Ortalyq Azııa men Eýropadan, Japonııadan kelgen 17-25 jas aralyǵyndaǵy jas ártisterge tabys tilegen quttyqtaý hatyn oqyp berdi. Quttyqtaýda mádenıet ulttyń rýhanı bolmysy, jany, aqyl-parasaty ekeni aıtylǵan. Sondaı-aq, halyqaralyq mańyzdy baıqaýlardyń jas bıshilerdiń ónerin kásibı shyńdaýǵa yqpal etetini, elimizdi órkenıet bıigine jeteleıtini baıandalǵan.
Baıqaýdyń júlde qorynda áıelder men erler arasynda (jeke-dara) Gran-prı, birinshi, ekinshi, úshinshi oryndar syılyqtary jáne birneshe yntalandyrý júldesi bar. Olar úzdik dýet, «Úkili úmit», zamanaýı horeografııany úzdik oryndaýshy atalymdary boıynsha beriledi. Sondaı-aq, «Petıp murasynyń qory» men Bratıslava Ulttyq teatry (Slovakııa) da baıqaýǵa arnaıy syılyq taǵaıyndap otyr. Osy syılyqtyń ıegeri 2016-2017 jyldary Bratıslava teatrynyń sahnasynda Marıýs Petıptiń «Korsar» baletiniń áıel nemese er adam partııasynyń basty rólin oryndaý múmkindigine ıe bolady.
Aıta keteıik, baıqaýdyń qazylar alqasyna qazirgi balettiń beldi tulǵalary enip otyr. Olar – Majarstan ulttyq baletiniń dırektory, keremet bıshi ári horeograf Tamas Zolımozı, Beıjiń bı akademııasynyń professory, Qytaı ulttyq bı qaýymdastyǵy balet komıtetiniń atqarýshy vıse-prezıdenti Sıao Sýhýa, daryndy horeograf, áıgili baletmeıster Irjı Kılıannyń assıstenti Stefan Jeromskıı, ıtalııalyq baletmeıster Lýıdjı Bonıno, «Dance Open» halyqaralyq balet festıvaliniń negizin qalaýshy Vasılıı Medvedev, Balet konkýrstary halyqaralyq federasııasynyń bas dırektory Sergeı Ýsanov. Al qazylar alqasynyń tóraıymy – Qazaq ulttyq horeografııa akademııasynyń rektory Altynaı Asylmuratova.
Aıgúl SEIILOVA,
«Egemen Qazaqstan»