Astanadaǵy Ulttyq akademııalyq kitaphanada Táýelsizdiktiń 25 jyldyǵyna oraı Almaty oblysy kúnderiniń aıasynda «Jeruıyq meken – Jetisý» atty kitap kórmesi ashyldy.
Jetisý – qaıtalanbas tulǵalar: Súıinbaı, Jambyl, Úmbetáli, sondaı-aq daraboz aqyn-jazýshylar Ilııas Jansúgirov pen Ánýar Álimjanov, Muqaǵalı Maqataev pen Saıyn Muratbekov týǵan ólke. Halqymyzdyń ardaqty uldary Oraz Jandosov pen Muhamedjan Tynyshbaev esimderi de Jetisý ólkesimen baılanysty.
Sharanyń maqsaty – Jetisý men Astana turǵyndary arasynda mádenı baılanys ornatý, jastardy júıeli oqýǵa baýlý, «Mádenı mura» baǵdarlamasy aıasynda Jetisý aqyn-jazýshylarynyń, kompozıtorlarynyń shyǵarmalaryn nasıhattaý. Sondaı-aq astanalyqtarǵa Almaty oblysynyń mádenı órleýi men ónerdegi jetistikterin tanystyrý, zamanaýı ulttyq mádenıet pen ádebıettiń laıyqty ornyn kórsetý.
Kórmeni Almaty oblystyq mádenıet basqarmasynyń basshysy Aqan Ábdýálıev ashty. Sharaǵa «Qazaq Pen» klýbynyń prezıdenti, jazýshy Bıgeldi Ǵabdýllın, «Qazaq Pen» klýbynyń múshesi, jazýshy Smaǵul Elýbaı, «Qazaq ádebıeti» gazetiniń bas redaktory, jazýshy Jumabaı Shashtaıuly, sondaı-aq Jetisýda týyp-ósken basqa da birqatar óner adamdary qatysty.
Kórmege Almaty oblysy ákiminiń qoldaýymen 2006-2016 jyldar aralyǵynda jaryq kórgen 319 avtordyń kitaptary qoıyldy. Shyqqan jyly boıynsha hronologııalyq retpen ornalastyrylǵan sórelerden ólkeniń aqyn-jazýshylarynyń, kompozıtorlarynyń týyndylarymen tanysýǵa bolady.
Aıgúl SEIILOVA,
«Egemen Qazaqstan»
Sýretti túsirgen
Erlan OMAROV,
«Egemen Qazaqstan»