Qostanaıda I.Omarov atyndaǵy oblystyq qazaq drama teatrynyń burynǵy dırektory Nurlan Erekeshevke, burynǵy bas býhgalter Gúlzada Bektursynovaǵa jáne býhgalter kassır Meńsulý Kúltaevaǵa qatysty sot isi bastaldy. Olardyń úsheýi de aldyn ala kelisip, uıymdasqan túrde memlekettik kommýnaldyq qazynalyq kásiporynǵa bólingen bıýdjettik qarjyny asa iri kólemde uralaǵany úshin aıyptalyp otyr.
Teatrdyń 2011 jyldyń qańtarynan 2016 jyldyń naýryzyna deıingi esep-qısap materıaldary boıynsha tekserý organdary anyqtaǵandaı, dırektor N.Erekeshev óziniń laýazymdyq qyzmetin paıdalana otyryp, bas býhgalter G.Bektursynovamen jáne kassır M.Kúltaevamen aldyn ala kelisip, sybaılastyqpen asa iri kólemde memleket qarjysyn jymqyrǵan. Kassır M.Kúltaeva banktegi esep aıyrysý shotynan shyǵys-kassalyq order boıynsha qarjyny qolma-qol aqshaǵa aınaldyryp, shyǵaryp alyp otyrǵan. Osylaısha ony úsheýi bólisip kelgen. Al Bektursynova urlanǵan qarjynyń izin býhgalterlik qujattarmen jaýyp kelgen. Árıne, olarǵa dırektor N.Erekeshevtiń qoly qoıylady jáne ol býhgalter men kassırdi qamqorlyǵyna alǵan.
Alǵashqy sot otyrysynyń ózinde kýágerlerdiń sózinen tekseris kezinde kiris jáne shyǵys-kassalyq qujattardyń qaıtadan jasalǵany málim boldy. Sondaı-aq adamdardyń qolyn syrttaı qoıyp, olardyń atyna jalǵan qujattar toltyrylyp, aqsha jazǵan faktiler de molynan kezdesti. Qysqasy, osyndaı «ádis-tásildermen» teatr dırektory N. Erekeshev bastaǵan qylmystyq top 2011 jáne 2016 jyldar aralyǵynda bıýdjetten teatrǵa dep bólingen 163 mıllıon teńgege qol salǵan.
Kúdiktilerge Qylmystyq kodekstiń 176-baby 4-bóliminiń «b» tarmaǵy, 314-bólimniń 1 tarmaǵy boıynsha, ıaǵnı ózgeniń senip tapsyrǵan múlkin asa iri kólemde urlaǵany jáne talan-tarajǵa salǵany, laýazymyn paıdalana otyryp, jalǵan qujattar jasaǵany úshin aıyp taǵyldy.
Názıra JÁRIMBETOVA