Qazaqstan Respýblıkasynyń Memlekettik hatshysy Gúlshara Ábdiqalyqova Eýropadaǵy qaýipsizdik jáne yntymaqtastyq uıymynyń Astanadaǵy Baǵdarlamalar ofısiniń basshysy Derd Sabomen kezdesti.
Kezdesý barysynda taraptar Qazaqstannyń EQYU sheńberindegi yntymaqtastyǵynyń jaı-kúıi men perspektıvalaryn talqylady. Memlekettik hatshy 2010 jyly Astanada ótken EQYU sammıtiniń qorytyndysy boıynsha qabyldanǵan «Qaýipsizdik qoǵamdastyǵy jolynda» atty Astana deklarasııasyn iske asyrý Qazaqstannyń basty qyzmetiniń biri bolyp sanalatynyn atap ótti.
G.Ábdiqalyqova Astanadaǵy EQYU Baǵdarlamalary ofısimen aradaǵy jolǵa qoıylǵan jumys tetigi jergilikti jerlerde uıymnyń tıimdiligin arttyrýdyń úlgisine aınalǵanyn aıtty. Bul rette jobalardy ázirleý, úkimettik qurylymdarmen birlesip jalpy josparlaý jáne ony Syrtqy ister mınıstrligimen úılestirý úderisine qanaǵattanatynyn bildirdi. 2016 jyly Qazaqstannyń múddeli memlekettik organdary EQYU-men birlesken 50 jobany oıdaǵydaı júzege asyrýda.
Memlekettik hatshy qazirgi zamanǵy qaýipsizdikke qater tóndirip turǵan halyqaralyq, jergilikti jáne dinaralyq qaqtyǵystardyń aldyn alý isinde halyqaralyq quqyqtyń aıqyn ústemdigi arqyly qaqtyǵyssyz álem qurýǵa shaqyratyn Qazaqstan Prezıdenti Nursultan Nazarbaevtyń «Álem. XXI ǵasyr» manıfesiniń aıryqsha ózektiligin atap ótti.
Sonymen birge, G.Ábdiqalyqova mártebeli meımandy Bes ınstıtýsıonaldyq reformany iske asyrý jónindegi Ult josparynyń oryndalý barysy jáne Qazaqstan Respýblıkasy Táýelsizdiginiń 25 jyldyǵyn merekeleý aıasynda ótetin is-sharalar týraly habardar etti. Ol táýelsizdik jyldarynda ekonomıkanyń nyǵaıyp, halyqtyń ál-aýqaty artqanyn, Qazaqstan qoǵamy jalpyulttyq kelisim men qoǵamdyq turaqtylyqtyń úlgisi retinde qarastyrylyp otyrǵanyn, al elimiz jaýapty ári qurmetti halyqaralyq seriktes retinde tanylǵanyn atap aıtty.
EQYU-nyń Astanadaǵy Baǵdarlamalar ofısiniń basshysy Qazaqstan Respýblıkasynyń Memlekettik hatshysyna jyly shyraıly qabyldaýy úshin alǵys aıtyp, EQYU-nyń Qazaqstanmen aradaǵy yntymaqtastyǵynyń aldaǵy ýaqytta da jemisti bola beretinine senim bildirdi.
Sondaı-aq, taraptar Astana EKSPO-2017 halyqaralyq kórmesine EQYU-nyń qatysý máselesin talqylady.
Kezdesý sońynda G.Ábdiqalyqova Qazaqstan men EQYU arasyndaǵy dıalog pen ózara túsinistikti nyǵaıtý isinde D.Saboǵa tabys tiledi.
«Egemen-aqparat»