Tennıs. Máskeýde beısenbi kúni ótkizilgen Devıs Kýbogy álemdik tobynyń jerebesi pleı-off matchyn Reseı jáne Qazaqstan quramalary ashatynyn kórsetip berdi. Top oıyndary 16-18 qyrkúıek kúnderi osy qalanyń ulttyq tennıs ortalyǵynyń kortynda oınalady. Munda keshe Andreı Kýznesov (Reseı) – Aleksandr Nedovesov (Qazaqstan), Evgenıı Donskoı (Reseı) – Mıhaıl Kýkýshkın (Qazaqstan) kezdesti. Búgin reseılik Konstantın Kravchýk jáne Andreı Rýblev juby qazaqstandyq Nedovesov jáne Andreı Golýbev dýetimen oınaıdy. Al erteń Kýznesov – Kýkýshkın, Donskoı – Nedovesov matchtary ótedi.
Voleıbol. Vetnamda ótip jatqan Azııa kýbogy úshin týrnırde Qazaqstannyń qyzdar quramasy Ońtústik Koreıa komandasyn úsh partııada (25:9, 25:13, 25:14) utyp shyqty. Bul oıynǵa bizdiń qarsylasymyz jastar quramasyn qoıdy. Munyń aldynda qazaqstandyqtar Japonııa komandasynan 1:3 esebimen utylyp qalǵan edi. Keshe Vıacheslav Shaprannyń shákirtteri Qytaı voleıbolshylarymen kezdesti. Týrnır 20 qyrkúıekte aıaqtalady.
Fýtbol. Qazaqstannyń 19 jasqa deıingi jasóspirim qyzdar quramasy Eýro-2017 irikteý týrnırinde Fınlıandııa komandasynan 0:7 esebimen kúıreı jeńildi. Qarsylastar birinshi dopty 4-mınýtta túsirdi (Ronıa Ikonen). Al 7 jáne 11-mınýttarda Iýýlı Ketola taǵy eki gol saldy. Budan keıin ol penaltıden het-trık jasady. Dýbldi Emmalıına Týlkkı jasasa, sońǵy núkteni Týýlıa Mıkkola qoıdy. Jerlesterimiz kelesi kezdesýin búgin Islandııa quramasymen ótkizedi.
Boks. Daǵystannyń astanasy – Mahachkalada M-S. Ýmahanovty eske túsirýge arnalǵan XVIII memorıal márege jetti. Halyqaralyq týrnırge qatysqan qazaqstandyq qyzdar arasynda Nazym Ishanova (60 kg) – altyn, Aqmaral Shamshıdenova (75) – kúmis, Shynar Iýldasheva (75) qola medalǵa qol jetkizdi. Nazym birinshi oryndy belorýs qarsylasy Galına Brıýevıch rıngke shyqpaı qalýyna baılanysty shaıqassyz alsa, Aqmaral aqtyq aıqasta sol eldiń ókili Vıktorııa Kebıkovadan utylyp qaldy. Jigitter arasynda Saparbaı Aıdarov (75) fınalda reseılik Vladıslav Fedıýrınnen 0:3 esebimen jeńilip, kúmis medaldy qanaǵat tutty.
Velosport. «Astana» ıtalııalyq jas veloshabandoz Rıkardo Mınalımen kelisimshartqa otyrdy. Buǵan deıin ol óz elinde ótken Trofeo Comune di Vertova jarysynda 2012, 2013 jyldary, Circuito del Porto – Trofeo Arvedi saıysynda 2015 jyly jeńiske jetken. 21 jastaǵy sprınter – burynǵy belgili veloshabandoz Nıkolo Mınalıdiń uly. Ol bıylǵy maýsymda birinshi ret «Astana» velokomandasy sapynda kásipqoı sportshy retinde óner kórsetetin bolady.
«Egemen-aqparat»