Prezıdent Almatynyń Medeý aýdanyndaǵy jańa sport kesheniniń ashylýyna qatysty dep habarlaıdy Egemen-aqparat. Memleket basshysy ǵımarattyń qyzmetimen tanysyp, keshen aýmaǵyn aralady. Budan keıin Nursultan Nazarbaev bir top áıgili sportshymen kezdesip, áńgimelesti.
– Qazaqstan ózin sport derjavasy retinde tanyta bildi. Bul jetistiktermen shektelmeý kerek. Sporttaǵy elimiz baǵyndyrǵan bıikterdiń deńgeıin budan ári kótere túsý qajet. Memleket halyqtyń densaýlyǵyna basa kóńil bólip otyr. Dúnıejúzilik qysqy ýnıversıadaǵa daıyndyq barysynda zamanaýı sport ǵımarattary salyndy. Ol kópshiliktiń, ásirese balalar men jastardyń sportpen shuǵyldanýyna qosymsha serpin beredi, – dedi Memleket basshysy.
3 myń kórermenge arnalǵan muz aıdyny hokkeı jarystaryn ótkizýge laıyqtalǵan. Ýnıversıadadan keıin «Halyq Arenany» qalalyq hokkeı komandalarynyń oıyn alańyna, balalar men jasóspirimder sportyn damytý, sondaı-aq turǵyndardyń jappaı syrǵanaý ortalyǵyna aınaldyrý josparlanýda. Keshen konsertter, kópshilik mádenı is-sharalar ótkizýge laıyqtalyp, qazirgi zamanǵy jaryq jáne dybys qurylǵylarymen jabdyqtalǵan.
Egemen-aqparat