Qaraǵandy oblysyndaǵy Jańaarqa aýdanynyń ortalyǵy Atasý kentinde Aralbaı batyrǵa eńseli eskertkish qoıyldy. Tulpar minip, tý ustaǵan batyrdyń músinin pavlodarlyq sheber Marat Ábilqasymov somdaǵan.
Osydan bes jyl buryn batyrdyń ónegeli de uıymshyl urpaqtary Aralbaı babanyń 325 jyldyǵyn laıyqty túrde atap ótip, as bergen edi. Sol jyly aýdan ortalyǵynan onyń atyna kóshe de buıyrǵan bolatyn. Endigi kezek eskertkishke kelip, sol kósheniń basyna batyrdyń at ústinde turǵan aıbarly eskertkishi oryn tepti.
Aralbaı batyr eskertkishiniń ashylý saltanatynda aıtysker aqyn Amanjol Áltaev eski tarıhtan qalǵan estelikterdi tiriltip, elin-jerin qorǵaǵan erdiń ómirtarıhyna jan-jaqty sholý jasady. Budan keıin eńbek ardageri Hamze Sátjanov, jazýshy Aldan Smaıyl, aqyn Serik Aqsuńqaruly jáne aýdan ákimi Ǵabdrahman Omarov eskertkishtiń jamylǵysyn sypyryp, ashylý rásiminiń yrymyn oryndady.
Sonymen qatar, eskertkishtiń ashylý saltanatynda aýyl aqsaqaly Moldazaıym Hıshaýov bata berse, jergilikti aqyn О́mirjan Kópbosynov jyrdan shashý shashty. Sóz sóıleýshiler taǵylymdy sharanyń urpaq tárbıesinde alatyn orny zor ekendigine toqtalyp, eskertkishti ornatýǵa atsalysqan azamattarǵa alǵystaryn bildirdi.
Aıta keterligi, eskertkishke jumsalǵan 11 mıllıon teńge qarjyny batyrdyń urpaqtary óz ortalarynan shyǵarǵan eken.
Tárbıelik, taǵylymdyq máni zor bul shara Qazaqstan Respýblıkasy Táýelsizdiginiń 25 jyldyǵyna arnaldy. Rasynda da, Aralbaı batyrdyń el shetin ata jaýdan qorǵap, qazaqtyń jerin aman saqtap, búgingi urpaqqa amanttap ketken erlerdiń qatarynan ekendigi ata tarıhtan málim.
Qaırat ÁBILDINOV,
«Egemen Qazaqstan»
Qaraǵandy oblysy,
Jańaarqa aýdany