Qazaqstanda buǵan deıin qanatqaqty rejimde jumys istep kelgen Ulttyq dárilik formýlıar (UDF) resmı bekitilip, iske qosyldy. Tıisti buıryqqa Densaýlyq saqtaý jáne áleýmettik damý mınıstri Tamara Dúısenova qol qoıǵan.
Osylaısha, Otanymyz TMD elderiniń arasynda mundaı aqparattyq resýrsty iske qosqan alǵashqy respýblıka bolyp otyr. UDF-ny jasaqtaý barysynda farmokoterapııa salasyndaǵy ozyq álemdik tájirıbe basshylyqqa alynǵan eken.
Bul dárilik kómek azamattardyń áleýmettik jaǵdaıy men tabysyna qaramastan bárine birdeı qoljetimdi bolmaq. Sebebi, munda dári-dármekterdiń shekti baǵalary kórsetilgen. Formýlıar júıeli túrde jańartylyp otyratyndyqtan, medısınalyq qyzmetkerlerge dári-dármek túrleri, olardy qoldaný tájirıbesi týraly jańa maǵlumattar alyp, farmasevtıka salasyndaǵy bilimin jetildirip otyrýǵa múmkindik beredi.
Ulttyq formýlıardy qalyń jurtshylyq ta www.knf.kz saıty arqyly orys jáne qazaq tilderinde onlaın-rejımde qoldana alady. UDF Dúnıejúzilik densaýlyq saqtaý uıymy maquldaǵan júıe boıynsha qurylǵan. Preparat týraly eń qajetti aqparattyń bári bir bette jınaqtalǵan. Al qajet bolǵan jaǵdaıda, siltemeni ashyp, keńirek maǵlumat alýǵa bolady. Keri baılanys júıesi arqyly saıtty qoldanýshylar óz pikirleri men usynystaryn qaldyra alady.
Joba 2015 jyldyń sońynda elimizdiń turǵyndaryna usynylyp otyrǵan dárilerdiń sapasy, qaýipsizdigi men qoljetimdiligi máselelerin sheshý maqsatynda qolǵa alynǵan bolatyn. Oǵan mınıstrliktiń Medısınalyq jáne farmasevtıkalyq qyzmetti baqylaý komıteti uıytqy bolǵan. UDF-ny jasaqtaýǵa shetelderdiń tájirıbeli farmakologtary tartylypty. Qazaqstandyq ulttyq formýlıardy mamandarǵa jáne qalyń kópshilikke tanystyryp, qoldanys aıasyn keńeıtý maqsatynda Densaýlyq saqtaýdy damytýdyń respýblıkalyq ortalyǵy elimizdiń aımaqtarynda semınarlar ótkizip, tanystyryp otyrýdy qolǵa almaq.
«Egemen-aqparat»