Qazaqstan Respýblıkasynyń Syrtqy ister mınıstrligi elimizdiń Bas redaktorlar klýbymen birlesip ústimizdegi jyldyń mamyr-shilde aılarynda «Qazaqstan halyqaralyq BAQ kózimen» atty úshinshi konkýrs uıymdastyrǵan bolatyn. Baıqaýǵa usynylǵan 60 usynymnyń ishinen Fransııa, AQSh, Túrkııa, Iordanııa jáne Reseıdiń ókilderi bolyp tabylatyn bes jýrnalıst jeńimpaz atandy.
Mınıstrlikte marapattalǵan «The Huffington Post», «The Washington Times», «The Jordan Times», «Enıchag» gazetteriniń tilshileri kórikti Býrabaı aımaǵynda qonaqta bolyp, Qazaqstannyń injý-marjandarynyń ǵajaıyptarymen tanysty. Olar el maqtanyshyna aınalǵan bes juldyzdy «Rixos Borovoe» oteline ornalastyryldy.
Sapar barysynda Aqmola oblystyq týrızm basqarmasy «Býrabaı – Qazaqstannyń injý-marjany» atalatyn aqparattyq-jarnamalyq týr uıymdastyrdy. Sondaı-aq, sheteldik jýrnalıster «Býrabaı-Damý» jaýapkershiligi shekteýli seriktestiginiń «Vızıt ortalyǵyn», Býrabaıdaǵy tabıǵat mýzeıin, «Abylaı han memorıaldyq-tanymdyq alańyn» aralap, mádenı-sáýlet kesheniniń, «Abylaı han ordasy» ekspozısııalyq kórme zalynyń, «Aınakól» jáne «Álem» otelderiniń qonaqjaılyq rásimderine kýá boldy.
Qonaqtar Býrabaı aımaǵyn salt júrip saıahattaýdaǵy, qymyz ben ystyq baýyrsaqtan dám tatqandaǵy áserlerin rızashylyqpen aıtyp jatty. Árdaıym jumys barysyndaǵy jýrnalıster qaıtalanbas tabıǵat kórinisterin sýretke túsirip, jergilikti turǵyndarmen emen-jarqyn suhbat júrgizdi. Olar Qazaqstannyń týrıstik áleýetine joǵary baǵasyn berdi.
Sapar sońynda Aqmola oblystyq týrızm basqarmasynyń basshysy Shynarbek Batyrhanov pen delegasııa jetekshisi, QR Syrtqy ister mınıstrliginiń ókili Aıman Tórebekova qonaqtarǵa «EKSPO-2017» halyqaralyq kórmesine arnaıy daıyndalǵan qazaqstandyq brend – aǵash ydys jıyntyqtaryn syı-sııapat retinde usyndy. Buǵan qosa, baıqaýdyń jeńimpaz jýrnalısteri álemniń 100 memleketinen resmı ókilder qatysatyn kórmege shaqyrý bıletterimen marapattaldy.
Baqbergen AMALBEK,
«Egemen Qazaqstan»
Aqmola oblysy