Qazaq ulttyq agrarlyq ýnıversıteti álemniń jetekshi agrarlyq oqý oryndarymen aradaǵy yntymaqtastyqty damytýda belsendi jumystar atqarýda. Ýnıversıtet basshylyǵy sońǵy jyldary Shyǵys Azııanyń birneshe ýnıversıtetterimen tyǵyz baılanys ornatyp, ǵalymdar men stýdentter almasý, sala ǵalymdarymen birlese zertteýler júrgizý úshin ózara yntymaqtastyq týraly birqatar kelisimderge qol qoıǵan bolatyn.
Shyǵys Azııa men Qazaq eli arasyndaǵy áriptestik baılanysty odan ári jandandyrý maqsatynda ýnıversıtet rektory, akademık Tilektes Espolov taıaýda Qytaıdyń Soltústik-batys aýyl jáne orman sharýashylyǵy ýnıversıtetiniń ókilderin qabyldaǵan edi. Delegasııa quramynda ýnıversıtet prezıdenti Sýn Chıshın, Kókónis sharýashylyǵy kolledjiniń dekany Ma Fengvan, Ekstenshen tehnologııalar men ǵylym basqarmasynyń dırektory Vang Iаpeng, Agronomııa kolledjiniń professory Hý Ingan, Ekonomıka jáne menedjment kolledjiniń professory Vaı Feng, Halyqaralyq yntymaqtastyq jáne almasýlar basqarmasynyń dırektory Iý Lın jáne Ekonomıka kolledjiniń dekany Shan Veksın bar.
Ýnıversıtet basshysy eki el arasyndaǵy baılanystyń barlyq sala boıynsha damyp jatqanyn, oqý ornynyń qyzmeti, halyqaralyq qatynastar týraly sóz qozǵap, «Biz ýnıversıtetter arasyndaǵy yntymaqtastyqtyń negizgi 5 baǵytyn anyqtadyq. Olar: jemis-jıdek daqyldaryn ósirý tehnologııasy, Sý resýrstary men tehnologııalaryn zertteý, mal bordaqylaý resýrstarymen qamtamasyz etý, azyq-túlik ónimderiniń bıotehnologııasy bolyp tabylady. Bul áriptestik baılanys jaqyn arada óz jemisin berip, elimizdegi bilim men ǵylymnyń damýyna yqpal etedi dep oılaımyn», – dese, Soltústik-batys aýyl jáne orman sharýashylyǵy ýnıversıtetiniń prezıdenti Sýn Chıshın eki el arasyndaǵy baılanystyń keleshegine qysqasha toqtalyp ótti. Sondaı-aq, QazUAÝ-men birlese maman daıyndaý, ınnovasııa salasy boıynsha baılanysty damyta otyryp, ǵylym-bilim keńesin qurý, sonymen qatar, ózi basshylyq etetin ýnıversıtette Qazaq elinen kelgen stýdentterdi oqytý úshin granttar sanyn arttyrý týraly josparlarymen bólisti. Qazirgi tańda Qazaq ulttyq agrarlyq ýnıversıtetine bilim mekemesi magıstratýra boıynsha 5 grant usynylǵanyn da jetkizdi.
Júzdesýge Aýyl sharýashylyǵy vıse-mınıstri Gúlmıra Isaeva arnaıy qatysqanyn da aıta ketsek deımiz. Sonymen, kezdesý qorytyndysynda joǵary oqý oryndarynyń basshylary eki kelisimge qol qoıdy. Biri – akademııalyq utqyrlyq baǵdarlamasyn júzege asyrý jáne oqytýshylar men stýdentter almasý, ekinshisi – birlese ǵylymı-zertteý jobalaryn daıyndaý. Ǵylymı keńestiń sheshimimen Soltústik-batys aýyl jáne orman sharýashylyǵy ýnıversıtetiniń prezıdenti Sýn Chıshın myrzaǵa oqý ordasynyń «Qurmetti professory» ataǵy berildi.
«Egemen-aqparat»