Oblys ákimi Berdibek Saparbaev Jer kodeksine ózgerister men tolyqtyrýlar engizilýine baılanysty qurylǵan úshjaqty komıssııanyń múshelerimen kezdesip, olardyń belsendi is-qımylyna rızashylyǵyn bildirdi. Túıip aıtqanda, óńir basshysynyń tapsyrmasyna oraı, Jer kodeksine ózgerister men tolyqtyrýlar engizilýine baılanysty elimizde birinshi bolyp, Aqtóbe oblysynda Jer kodeksiniń normalaryn talqylap, óz usynystaryn engizý úshin úshjaqty komıssııasy qurylǵan edi. Komıssııa músheleri Aqtóbe qalasynda jáne oblys aýdandarynda jer reformasynyń negizgi normalaryn jáne bıliktiń osy máselege oraı jaǵdaıdy turaqtandyrýda atqaryp jatqan sharalary boıynsha birlesken túsindirý jumystaryn júrgizdi. Komıssııanyń jumysy nátıjeli bolýy úshin aýdan ortalyqtarynda jáne Aqtóbe qalasynda azamattardy qabyldaý pýnktteri jumys istedi.
О́ńir basshysy jer máselesin talqylaýda, halyq arasynda túsinik jumystaryn júrgizýde úsh aıdan astam jumys istegen komıssııa qyzmetine oń baǵa berdi. Komıssııa músheleri Estaı Jaılybaev, Izimǵalı Kóbenov, Kóshkinbaı Ahmetov óz kezeginde oblys ákimine komıssııa qurý týraly der kezinde sheshim shyǵaryp, bul problemaǵa erekshe nazar aýdaryp, onyń jumysyna qoldaý kórsetkeni úshin alǵystaryn bildirdi.
– Bizdiń komıssııa óz jumysynda jaqsy nátıjeler kórsetti. Biz sizge bul máselege qatysty qoldaý jasaǵanyńyz úshin yqylas sezimimizdi bildiremiz, – dedi Estaı Jaılybaev. Kóshkinbaı Ahmetovtiń aıtýynsha, respýblıkalyq komıssııada qabyldanǵan 10 sheshimniń 9-y aqtóbelik belsendilerdiń usynystary eken.
– Bizdiń negizgi mindetimiz – halyqtyń ál-aýqatyn jaqsartý úshin barlyq jaǵdaıdy jasaý. Bul – Memleket basshysynyń tapsyrmasy. Biz óz tarapymyzdan bul mindetti sheshý úshin barlyq múmkindikterdi oılastyramyz. Komıssııa alda da jumys isteıtin bolady. Halyqtyń taǵdyryna beıjaı qaraı almaıtyn jandarmen jumys isteý maǵan unaıdy, sizdermen basqa da mańyzdy máseleler boıynsha birlesip jumys isteıtin bolamyz, – dedi Berdibek Saparbaev.
О́ńir basshysy komıssııa múshelerine jer máselesine qatysty belsendi jumystary úshin Alǵys hattar tapsyrdy.
Satybaldy SÁÝIRBAI,
«Egemen Qazaqstan»
Aqtóbe oblysy