Bul kúnde ónerge talasy barlar kóp-aq. Shyn talant pen ánshi bolýǵa talaptanýdyń arasy jer men kókteı ekeni ámbege aıan. Alaıda ánshi bolyp týǵan adamdy jórgeginen tanyp, daryndardy demeý qazirgi sahna tarlandaryna, tájirıbeli tulǵalarǵa da amanat. Osydan biraz jyl buryn KSRO halyq artısi Bıbigúl Tólegenova bir baıqaýdy bastap, klassıkalyq ónerge beıim birqatar jastardyń úlken sahnaǵa joldama alýyna septigin tıgizgen edi.
Almatyny bir ajarlandyryp ótetin sol óner baıqaýy bıyl segizinshi ret ótpek. Qyrkúıektiń 19-27 aralyǵynda ótetin Bıbigúl Tólegenova vokalısteriniń VIII Halyqaralyq baıqaýy bul joly Táýelsizdigimizdiń 25 jyldyǵy men Almaty qalasynyń 1000 jyldyǵyna arnalmaq.
Baıqaýǵa álemniń ár shalǵaıynan aıtýly mýzykanttar qazylyq etýge keledi. Irgemizdegi Qyrǵyzstan, О́zbekstan, odan ári Ázerbaıjan, Lıtva, Reseı, Germanııa, Chehııa, Mońǵolııa, Bolgarııa syndy memleketterden opera salasyna qulash urǵan 65 ánshi Almatyda bas qosady.
Joǵaryda atap ótkendeı, osynaý aýqymdy oqıǵa jas ánshilerdiń bıik talǵamyn, ónerge degen tereń túsinigin qalyptastyrýdy maqsat etedi. Halyqaralyq baıqaý jas ónerpazdardyń nazaryn klassıkalyq jáne halyq ánderine aýdaryp, olardy naǵyz ónerdiń bulaǵynan sýsyndaýǵa shaqyrady. Án saıysy jańa talanttardyń esimin anyqtap, ulttyq klassıkalyq ónerdi ulyqtamaq.
Baıqaý baǵdarlamasy da bekzat ónerdegi buryn-sońdy tańdaýly týyndylarǵa qurylǵan. Oǵan qosa Qazaqstan kompozıtorlary shyǵarmashylyǵynan da halyq ánderine uqsas týyndylar usynylady.
Irikteý kezeńi jáne fınaldyq saıys Jambyl atyndaǵy Memlekettik fılarmonııa zalynda, al ashylý jáne jabylý saltanaty Abaı atyndaǵy Memlekettik opera jáne balet teatrynda ótpek.
Halyqaralyq deńgeıdegi óner maıtalmandary konkýrs aıasynda kezdesýler ótkizip, daryndy jastarmen dıdarlasyp, tájirıbe bólisedi. Qatysýshylardyń ónerin baǵalap, olardyń oryndaýlaryna qatysty jeke-jeke kózqarastaryn bildiredi. Sondaı-aq jastarǵa baǵaly aqyl-keńesterin de aıtady.
Halyqaralyq konkýrstyń Bas seriktesi – «SAMRUK KAZYNA TRUST» áleýmettik jobalardy damytý qory. Al uıymdastyrýshy – «Mıras» qoǵamdyq qory. Sondaı-aq vokalısterdiń halyqaralyq baıqaýyn ótkizýge Almaty qalasy ákimdigi qoldaý bildirip otyr.
Aınash ESALI,
«Egemen Qazaqstan»
ALMATY