Sahna sandyǵyndaǵy syrlar

Ulttyq mýzeıdegi M.Áýezov atyndaǵy Qazaq memlekettik akademııalyq drama teatry murajaıynyń Táýelsizdiktiń 25 jyldyǵy men teatrdyń 90 jyldyǵy qurmetine ashylǵan «Tarıh tolqynyndaǵy teatr shejiresi» kórmesi óner ujymy tarıhyn úsh kezeńge bólip tanystyrdy. Kórmeniń ashylý rásiminde Ulttyq mýzeıdiń dırektory Darhan Myńbaı teatrdyń qazaq rýhanııatyndaǵy róline aıryqsha toqtala kelip: «Almatydaǵy Muhtar Áýezov atyndaǵy akademııalyq drama teatry Táýelsizdik merekesi qar­sańyn­da bizge úlken tartý ázirlep alyp keldi. Biz muny teatrdyń tarıhy ǵana emes, jalpy qazaq ulttyq sahna óneri men tul­ǵa­larynyń shejiresi dep túsinýi­miz qa­jet. Sonaý HH ǵasyrdyń basyn­da, dálirek aıtsaq, 1926 jyly Qyzyl­orda  qa­la­synda bastaý alyp, «Altyn saqı­na», «Eńlik-Kebek» týyndylarymen kórer­menge jol tartqan qara shańyraqta eli­mizge tanymal kóptegen óner maıtal­mand­ary  qyzmet etti. Sondyqtan da onyń kele­shek jas urpaqqa berer úlgi-ónegesi kól-kósir. Osy maqsatta qazaq sahna óneri tarı­hy­nan syr shertetin kórmeniń Ulttyq mýzeıde ashylýy úlken jetistik bolyp tabylady», dedi. KSRO halyq ártisi, Memlekettik syılyqtyń laýreaty, M.Áýezov atyndaǵy Qazaq memlekettik akademııalyq drama teatrynyń kórkemdik jetekshisi Asanáli Áshimov: «Ár eldiń óziniń  tól mádenıeti bolýy kerek. Teatr halyqqa tárbıe beretin oryn desek, mundaǵy árbir jádigerdiń baǵasy biz úshin óte qymbat sanalady. Olar – bizdiń ómir baqı úlgi tutar ustazdarymyz, rýhanı azyǵymyz», deı kelip, sahnada ózi somdaǵan keıipkeriniń monologyn oqyp berdi. Qazaqstannyń eńbek sińirgen qaıratkeri, teatr dırektory Erlan Bilálov murajaıdaǵy jádigerlerdiń 1926-1956, 1956-1986, 1986-2016 jyl­dar dep, úsh kezeńge toptastyrylyp ta­nys­tyrylatynyn aıtsa, Qazaqstannyń halyq ártisi, professor Esmuhan Obaev: «Osy zaldan teatrdyń dúrsildep soǵyp turǵan júregin seze alasyzdar», dedi. Halyqaralyq «Alash» syılyǵynyń laýreaty Álııa Bópejanova: «Mysaly, Maıkl Djeksonnyń kıgen kıimderi mıllıondaǵan dollarǵa satylyp jatady. Qarap otyrsańyz,  osy eksponattaǵy kostıýmderdiń quny sondaı mólsherden aspasa, az emes», degendi aıtty. Qazaq­stan­nyń eńbek sińirgen qaıratkeri Sáýlebek Asylhanuly: «Joǵymyzdy ǵana emes, barymyzdy baǵalaıtyn kezge keldik. Kóńilimizdi shýaqqa toltyrǵan búgingi kórme arqyly adamdar arasyndaǵy sondaı mereıli sátter nasıhattalady», dedi. Eske sala keteıik, 1968 jyly 24 ma­my­r­­da ashylǵan murajaı qorynda bú­gin­d­­e 100 000-nan astam jádiger saq­tal­­ǵan. Kórmedegi qazaq teatr jáne kıno óneri qaıratkerleriniń  óner shańy­ra­ǵyndaǵy  shyǵarmashylyǵy men ómir ótkelderi jaıynda baıandaıtyn qylqalam týyndylary, tarıhı afıshalar, zerli, asyl matadan tigilgen kıim úlgileri,  spektaklderdiń maketteri men eskızderi, teatr óneri maıtalmandary tutynǵan jeke zattar, teatr týraly kitaptar, esseler men ocherkter qazaq qoǵamynyń tutas dáýirnamasy ispetti áser qaldyrady. Qarashash TOQSANBAI, «Egemen Qazaqstan» Sýrette: kórme usynǵan qun­dylyqtar