Oblysta Jer paıdalaný jáne qorǵaý jónindegi basqarma aýyl sharýashylyǵy mańyzy bar 13 361 gektar jerdi keri qaıtarý úshin isti sotqa berdi. Basqarma tóraǵasy Nurlan Qatarbekov baspasóz brıfınginde onyń basty sebepterin atady. Basty sebep – jerdi jalǵa alǵan azamattar oǵan kútimmen qaramaıdy, alqap qaý ósip bos jatady. Tekserý jalǵa alýshylarǵa 2012-2014 jyly berilgen jerlerge júrgizilgen.
Al 2016 jyldyń 8 aıynda basqarma jer telimderine 228 tekserý júrgizip, jerge baılanysty 152 zań buzýshylyqty tirkegen. 92,5 myń gektar jerdiń bos jatqandyǵyn anyqtaǵan. Ol boıynsha ákimshilik-óndiristik is qozǵalyp, 22,6 mıllıon teńge aıyp salyndy. Sonymen qatar, qurylys salýǵa tıisti 2 jer telimi de zańmen keri qaıtaryldy.
Aýdandyq ákimdiktiń usynysy negizinde aýdandyq máslıhattar Qazaqstan Respýblıkasynyń «Salyqtar men bıýdjetke tólenetin mindetti tólemder týraly» kodeksiniń 386- babyna sáıkes jalǵa alyp, paıdalanbaǵan aýyl sharýashylyǵy mańyzy bar jerlerge salyqty 10 ese kóbeıtken bolatyn. Jer paıdalaný jáne qorǵaý basqarmasy qazirdiń ózinde kútýsiz qalǵan 88,9 myń gektarǵa ıelik etip otyrǵan 44 jalǵa alýshyǵa qatysty isti memlekettik kirister departamentine jiberdi.
Názıra JÁRIMBETOVA