«Eńbek – bárin de jeńbek». «Eńbek etseń erinbeı, toıady qarnyń tilenbeı». «Eńbek etseń, emersiń». «Eńbektiń nany tátti». Eńbekke qatysty qazaq naqyldaryn osylaı tizbeleı bersek, onda birazǵa deıin jalǵastyratynymyz anyq. Bul neni bildiredi? Qazaq eńbektiń qadirin, eńbek etken adamnyń úlken jetistikke jetetinin bilgen jáne sony urpaǵyna uǵyndyryp, sát saıyn sanasyna sińirip otyrǵan. Ádette, «qazaq jalqaý halyq» degendi ekiniń biri aıtady ǵoı. Eger bizdiń jurt jalqaý, jatypisher bolsa, onda babalardan mynadaı ósıet qalmas edi.
Eńbek adamyn qurmet tutý, onyń jumysyn jurtshylyq nazaryna úlgi etip kórsetý degen dástúr bar. Sońǵy jyldary osy maqsatta Qyzylorda oblysy el súısinerlik qadamǵa bardy. Solaısha, jyl saıyn Eńbek áýletteriniń oblystyq forýmyn uıymdastyryp keledi. Bıyl úshinshi márte ótken forýmnyń urpaqqa berer tálim-tárbıesi az emes. О́ıtkeni, aımaqtyń eńbek dınastııalary qatysqan sharanyń negizgi maqsaty – óskeleń urpaqqa ónegeli tárbıe berý. Aımaqtaǵy temirjolshylar, dárigerler, ustazdar, dıqandar jáne ózge de eńbek áýletteri qoǵamǵa joǵary kásibı mamandar daıarlaýǵa úlken úles qosyp, el ekonomıkasynyń damýyna atsalysyp keledi.
Bıyl oblysta 8 eńbek áýleti jeńimpaz dep tanyldy. Olardyń arasynda eńbek tájirıbeleri 700 jyldan asatyn áýletter de bar. Máselen, Ábdirahmanovtardyń temirjol salasyndaǵy tájirıbesi 752 jyl bolsa, ustazdyq jolyn jalǵap kele jatqan Ostaevtar áýletiniń jalpy ótilderi 800 jyldan asady. Bul bir áýlet bir ǵana kásippen ǵasyrlar boıyna aınalysyp, urpaqtan-urpaqqa mura bolyp, óz isteriniń shyn sheberine aınaldy degen sóz.
Forýmǵa qatysqan oblys ákimi Qyrymbek Kósherbaev eńbek dınastııalaryn ulyqtaýdyń, qarapaıym eńbek adamdaryn qurmetteýdiń mańyzyna erekshe toqtalyp, sharaǵa arqaý bolǵan eńbekshi otbasylaryn merekemen quttyqtady.
– «Eńbek – álemniń ámirshisi» deıdi halyq danalyǵy. Syr eliniń dańqyn dala akademıgi Ybyraı Jaqaev bastaǵan 102 Sosıalıstik Eńbek Eri shyǵarsa, er-azamattarmen birdeı ıyq tirestire eńbek etip, memleket baılyǵyn eselep ósirgen Shyrynkúl Qazanbaeva, Sálıma Jumabekova, Ulbala Altaıbaeva, Jadyra Taspambetova, Zákıra Erjanova sııaqty aqjaýlyqty analarymyzdyń eren eńbekteri búgingi jas urpaq úshin ańyzǵa aınaldy. Dala tósin dúbirletken Eńbek Erleriniń jalǵasy Syr eliniń perzentteri – kásipker Abzal Eralıev pen densaýlyq saqtaý salasynyń maıtalmany Iýrıı Pıa syndy Eńbek Erleri –Táýelsiz Qazaqstannyń maqtanyshtary. Eldiń atyn shyǵaratyn osyndaı eńbek dástúrin jalǵaǵan azamattar,– dedi Qyrymbek Eleýuly.
Forým barysynda eńbegi elengen áýletter ákimniń alǵys hatymen jáne baǵaly syılyqtarmen marapattaldy. Al qatysýshylar eńbekshi otbasylarynyń mereıin ústem etken el aǵalaryna alǵysyn bildirdi. Shara sońy merekelik konsertke ulasty.
Erjan BAITILES,
«Egemen Qazaqstan»
QYZYLORDA