Talǵampaz jurtshylyqty tańdandyrdy

Jaqynda Semeı qalasynyń Shákárim atyndaǵy memlekettik ýnıversıtetiniń professory, dırıjer, kompozıtor, Qazaqstan­nyń eńbek sińirgen qaıratkeri, Qazaqstan Respýblıkasy bilim berý isiniń úzdigi Orazǵalı Júnis­bekuly Seıitqazynyń Qazaqstan Respýblıkasy Táýelsizdiginiń 25 jyl­dyǵyna arnalǵan «Kıeli Semeı» atty jeke shyǵarma­shy­lyq konserti Almaty qalasy­nyń Qurmanǵazy atyndaǵy Memle­kettik akademııalyq qazaq halyq aspaptary orkestriniń konsert zalynda tabysty ótti. Almatydaǵy Qurmanǵazy atyn­daǵy konservatorııany bitirip, joldamamen Semeıge kelgen jas maman osynda qyryq jyldan astam ýaqyttan beri óner salasynda jemisti qyzmet atqaryp kele­di. Osy jyldar ishinde ol Ámire Qashaýbaev atyndaǵy oblystyq fılarmonııaǵa basshylyq etti, sonymen birge sondaǵy Bıbigúl Tólegenova atyndaǵy ult aspaptary ansambliniń bastaýynda bolyp, sol tanymal ansambldiń bilikti dırıjeri atandy. Orekeńniń san salaly sazgerlik joly men ulylar elindegi jas talanttardyń ustazy retindegi qajyrly eńbegi óz aldyna bir áńgime. Sonyń bári qosyla kelgende onyń Semeıdegi irgeli joǵary oqý ornynyń professory, Qazaqstannyń eńbek sińirgen qaıratkeri atanýyna jol ashty. Mine, endi ózara kelisim bo­ıynsha osydan birneshe aı buryn josparlanǵan Almatydaǵy jeke konsertinde O.Seıitqazy búkil dúnıe júzine keńinen tanymal qazaq mýzyka óneriniń kıeli qara shańyraǵyna aınalǵan ataqty óner ujymy – Qurmanǵazy atyndaǵy memlekettik akademııalyq qazaq halyq aspaptary orkestrine kesh boıy dırıjerlik jasady. Konsertte Abaı, Qurmanǵazy, N.Tilendıev shyǵarmalarymen qatar Semeı óńiriniń tanymal kom­pozıtorlary T.Bazar­baev­tyń, J.Dástenovtiń, Q.Dosym­janov­tyń, K.Aldekenovtyń tań­daýly shyǵarmalary, O.Seıitqazy orkestrge óńdegen L.Bokkerını­diń «Menýet», P.Chaıkovskııdiń «Shelkýnchık» baletinen «Gúl­der valsi», A.Babadjanıannyń «Noktıýrn» atty álemdik klassıka­lyq shyǵarmalary jáne óziniń kóptegen án-kúıleri oryndaldy. Konsertke elimizdiń ataqty óner juldyzdary – Qazaqstan­nyń halyq artısi, Memleket­tik syı­lyq­tyń laýreaty Altyn­bek Qoraz­baev, Qazaqstannyń eń­bek sińirgen qaıratkerleri Baıan Saǵynbaeva, Jarqyn Shá­kárim, Janas Bekenturov, Erkin Shúki­man, Dálel Ýásh, O.Seıit­qazy­nyń shákirtteri – QR Máde­nıet qaıratkeri, sybyzǵyshy Tal­ǵat Muqyshev, Halyqaralyq konkýrstardyń laýreaty, dombyrashy Aıbek Bekbosynov, Res­pýb­lıkalyq konkýrstyń dıp­lomanty, qylqobyzshy Merýert Aqanaeva jáne halyqaralyq kon­kýrstardyń laýreaty, ánshi Nursultan Shatyrhanuly, talapty jas ánshi, Semeı qalasynyń Shákárim atyndaǵy memlekettik ýnıversıtetiniń stýdenti Erlan Lespaevtar qatysty. Konserttik baǵdarlama tal­ǵampaz Almaty jurtshylyǵy­nyń kóńilinen shyǵyp, zor qoshe­metke ıe boldy. Atalǵan is-shara týraly beıneaqparat «Qazaq­stan» ulttyq telearna­synyń «Tańsholpan» baǵdarlama­synan kórsetildi. Búkil respýblıka kólemine bel­gili mýzyka qaıratkeri O.Seıit­qazynyń bul jeke shyǵarma­shylyq konsertin semeılikter, jalpy óner súıer qaýym úshin aıtýǵa turarlyq oqıǵa deýimizge de bolady. Olaı deıtinimiz, Semeı tur­maq, elimizdiń Shyǵys óńiri tarı­hynda O.Seıitqazydan buryn eshkim Almatydaǵy ataqty orkestr­men jeke shyǵarmashylyq konsertin ótkizbegen. Osydan-aq qaıratkerdiń kásibı deńgeıiniń joǵary ekendigi baıqalady. Son­dyqtan qaıratkerdiń tabysty bul konserti shyǵys óńiri mádenı ómirindegi de aıtarlyqtaı jarqyn bir beles boldy dep bilemiz. Al onyń el táýelsizdiginiń shırek ǵasyrlyq dúbirli merekesi qarsa­ńynda ótýi jáne jarasyp jatty. Dáýlet SEISENULY, jýrnalıst  ALMATY