Jańadan qurylǵan Qazaqstan Respýblıkasynyń Memlekettik qyzmet isteri jáne sybaılas jemqorlyqqa qarsy is-qımyl agenttigi jaqtan jaqsylyqtyń nyshanyndaı jaǵymdy bir jańalyq kelip jetti.
Endi aldaǵy ýaqytta agenttik sybaılas jemqorlyqqa qarsy zańnamalardy buzýshylyqqa jáne memlekettik qyzmetshiler tarapynan sybaılas jemqorlyqqa tózbeý prınsıpteriniń buljytpaı oryndalýyna basymdyq bermekshi eken. Basqalaı aıtqanda, agenttik paraqorlardy aýyzdyqtaýǵa bel sheship kirisetin sekildi. Qarqyny osyny ańǵartady.
Agenttikten kelip túsken aqparatqa súıensek, endigi jerde kózin shel basqan sheneýnikterdiń, memlekettik qyzmetshilerdiń beıádep áreketterine qatysty azamattardyń shaǵymdary turaqty túrde tirkeýge alynady. Azamattar kóbinese memlekettik qyzmetshilerdiń arasyndaǵy bir-birine yqylas tanytý keńinen taralǵandyǵyn atap kórsetedi eken. Bular – syılyqtar berý jáne ártúrli yńǵaıdaǵy kóńil kóteretin sharalar uıymdastyrý, qyzmettik sýbordınasııanyń saqtalmaýy.
Agenttiktiń aqparaty boıynsha, mundaı jaǵdaılardyń paıda bolýynyń basty sebebi, ózinen tómengi memlekettik organdardyń qyzmetin tekserý maqsatyndaǵy qyzmettik issaparlar bolyp tabylady. Ádette, tekserý kezinde laýazymdy tulǵalardy kóńil kóteretin mekemelerge aparý, olarǵa qymbat syılyqtar syılaý, qonaq úı aqysyn tóleý, sondaı-aq tekseristiń nátıjesi jaqsy bolýy úshin para usynylady.
Máselen, agenttik tarapynan Qaraǵandy oblysyna kóshpeli tekserispen barǵan Qarjy baqylaý komıtetiniń laýazymdy tulǵalaryna «erekshe qatynas» faktileri anyqtaldy. Osyndaı zań buzýshylyqtar óńirlik mektepterdi teksergen Ońtústik Qazaqstan jáne Aqtóbe oblystary boıynsha Bilim salasyn baqylaý boıynsha departamentterdiń laýazymdy tulǵalary tarapynan da tirkeldi. Osyǵan uqsas faktiler densaýlyq saqtaý jáne jer qatynastary salasynda da kezdesti.
Budan basqa basshylardyń týǵan kúnderin toılatý úshin qyzmetkerlerden aqsha jınaý faktisi de kezdesedi. Búgingi kúnge deıin mundaı kórinis ortalyq, sondaı jergilikti deńgeıdegi, jalpy barlyq memlekettik apparatqa tán dep aıtýǵa bolady.
Qazaqstan Respýblıkasynyń Memlekettik qyzmet isteri jáne sybaılas jemqorlyqqa qarsy is-qımyl agenttigi azamattardyń osyndaı shaǵymdary qatań baqylaýǵa alynyp, memlekettik qyzmetshilerdi ádep normalary men sybaılas jemqorlyq shekteýlerdi buljytpaı oryndaýyna kepildik beredi.
Agenttikte tegin konsýltatıvtik ortalyq jumys isteıdi, oǵan 1424 nómiri arqyly Qazaqstan boıynsha habarlasýǵa bolady. Sizderdiń barlyq shaǵymdaryńyz qabyldanady jáne qaralady.
Agenttik osylaı deıdi. Basqasyn qaıdam, agenttiktiń ant-sý ishpese de jibergen osy habarlamasynyń ózi kóńilge kádimgideı dem berip otyr...
Ǵabıt ISKENDERULY,
«Egemen Qazaqstan»